Ізраільскія сілы ўночы на 9 чэрвеня ўзялі пад свой кантроль судна, якое спрабавала прарваць марскую блакаду сектару Газа. Судна з экіпажам з 12 чалавек, уключаючы актывістку Грэту Тунбэрг, цяпер накіроўваецца ў порт у Ізраілі.
Яхта «Madleen» пад брытанскім сцягам, якой кіруе прапалестынская кааліцыя «Флатылія свабоды», збіралася даставіць сімвалічную дапамогу – рыс і дзіцячае харчаванне – у Газу, каб прыцягнуць увагу міжнароднай супольнасці да гуманітарнага крызісу ў гэтым раёне.
Сярод 12 чальцоў экіпажу была шведская экаактывістка Грэта Тунбэрг і Рыма Хасан, дэпутатка Еўрапейскага парламенту ад Францыі.
All the passengers of the ‘selfie yacht’ are safe and unharmed. They were provided with sandwiches and water. The show is over. pic.twitter.com/tLZZYcspJO
— Israel Foreign Ministry (@IsraelMFA) June 9, 2025
,,«Яхта для сэлфі "знакамітасцяў" шчасна накіроўваецца да берагоў Ізраілю. Чакаецца, што пасажыры вернуцца ў свае краіны», – напісала міністэрства на X.
У МЗС заявілі, што ўсе пасажыры ў бяспецы, «ім далі сэндвічы і ваду. Шоу скончана». Там адзначылі, што гуманітарную дапамогу ад затрыманых актывістаў перададуць у Газу па «рэальных гуманітарных каналах».
Ізраіль увёў марскую блакаду сектару Газа пасля таго, як ХАМАС узяў яго пад кантроль у 2007 годзе. Цяпер, падчас ізраільскай вайсковай аперацыі ў сектары ў адказ на палестынскую атаку 7 кастрычніка 2023 года, большасць з больш чым 2 мільёнаў жыхароў Газы сутыкаюцца з голадам, заяўляюць у Арганізацыі Аб'яднаных Нацыяў. Адмысловая дакладчыца ААН у правах чалавека на Палестынскіх тэрыторыях Франчэска Альбанэзэ падтрымала аперацыю «Флатыліі свабоду» і заклікала іншыя судны кінуць выклік блакадзе Газы.
Якуб Хруст belsat.eu
