навіны

«Забаранялі размаўляць па-казахску». «Белорусские продукты» ў Казахстане трапілі ў скандал

Крама «Белорусские продукты» ў Казахстане. Фота: yandex.net
Крама «Белорусские продукты» ў Казахстане. Фота: yandex.net
podpis źródła zdjęcia

Казахстанскія медыя паведамляюць пра скандал, у які ў краіне трапіла сетка крамаў «Белорусские продукты». Як заяўляецца, прадпрыемства забараняла мясцовым працаўнікам размаўляць паміж сабою на роднай мове.

Сетка крамаў «Белорусские продукты» пазіцыянуе сябе як афіцыйнага дыстрыб'ютара вядучых заводаў Беларусі на тэрыторыі Казахстану. Іх асартымент, як заяўляецца, уключае больш як 2500 найменняў мясных, каўбасных і малочных вырабаў, кансерваванай прадукцыі і паўфабрыкатаў, морапрадуктаў, соусаў і кандытарскіх вырабаў. На сёння сетка прадстаўленая больш як 100 крамамі ў самых буйных гарадах Казахстану. Яны прадстаўляюць прадукцыю самых буйных заводаў-вытворцаў Менску, Віцебску, Горадні, Берасця, Гомельшчыны і Магілёўшчыны, «забяспечваючы бесперабойныя пастаўкі свежых прадуктаў у самыя кароткія тэрміны».

Але нядаўна ў іх узніклі пэўныя праблемы. «Тіл кеспек жоқ» піша, што напачатку траўня «Белорусские продукты» падвергнуліся крытыцы ў сетцы «Threads». Заяўлялася, што адна з супрацоўніц бухгалтарскага аддзелу кампаніі, Айгуль Амангелдзіева, падвергнулася ціску за тое, што размаўляла па-казахску з калегай падчас працы, і ёй забаранілі гаварыць на казахскай мове на працы.

,,

«Нас пачалі пераследаваць пасля таго, як нам заявілі, што на працы мы так гаворым па-расейску, а паміж сабой гаворым на роднай мове», – сказала Айгуль.


Паводле яе, галоўная бухгалтарка Святлана Беляновіч адчытала іх, запатрабаваўшы размаўляць не па-казахску, а «на звычайнай мове, якую разумеюць усе». На заўвагу, што паміж сабою казахі працягнуць размаўляць па-казахску, на іх пачалі крычаць.

«Белорусские продукты» зняпраўдзілі пра ўціск праз мову. А на Айгуль пазней наклалі штраф, склалі пратакол і падвергнулі, паводле яе, псіхалагічнаму ціску:

,,

«У мяне падняўся ціск, і я выклікала хуткую дапамогу».


Айгуль паведаміла пра ўціск, якім яна падвяргалася на працы, свайму кіраўніцтву і аддзелу кадраў. Аднак, паводле яе, ніхто не распачаў ніякіх адпаведных дзеянняў і не пацікавіўся яе станам. У выніку жанчына сама звольнілася з працы.

І хоць пра забарону размаўляць у кампаніі па-казахску кажуць і іншыя былыя працаўнікі, самыя «Белорусские продукты» адмаўляюць гэта. Саму жанчыну ў кампаніі абвінавацілі ў хлусні і ў распальванні міжнацыянальнай варажнечы.

Нагадаем, што гэта не першы скандал з удзелам беларусаў у Казахстане сёлета. Праўда, мінулы быў больш пазітыўным. Напрыканцы сакавіка беларускія турысты выклалі відэа таго, як патрульныя спынілі іх у Туркестанскай вобласці Казахстану. Паводле беларусаў, у іх запатрабавалі 200 тысячаў тэньге за адсутнасць казахскага тэхагляду і траплянне на камеру. Турысты адзначылі, што нічога не парушалі і доказаў ім не далі, але яны «проста заплацілі і паехалі далей».

У дарожнай паліцыі Туркестанскай вобласці пачалі крымінальную справу, а ў дачыненні кіраўніцтва адпаведнага падраздзялення – службовае расследаванне. Апроч таго, вінаватых паліцыянтаў звольнілі. Віцэ-міністр турызму і спорту Казахстану Ержан Еркінбаеў заявіў, што «сапраўды, такі выпадак быў. І гэта не адзіны выпадак».

Якуб Хруст belsat.eu

больш па гэтай тэме

Глядзіце больш
Item 1 of 4

апошнія

Item 1 of 10