Офіс генеральнага пракурора Украіны паведаміў, што тры былыя міністры абароны Украіны падазраюцца ў дзяржаўнай здрадзе (ч.1 арт. 111 КК Украіны). Адзін з іх – Міхаіл Ежэль, які быў амбасадарам у Беларусі і дагэтуль жыве ў нашай краіне.
Паводле следства, з сакавіка 2010 года да лютага 2014 года, калі падазраваныя займалі пасаду міністра абароны Украіны, прымаліся рашэнні аб адчужэнні і рэалізацыі баяздольнага ўзбраення і вайсковай тэхнікі, фактычная наяўнасць якой была ніжэйшая за патрэбы Збройных сілаў Украіны.
У прыватнасці, на загад гэтых асобаў былі «беспадстаўна» рэалізаваныя сотні адзінак бранятэхнікі і артылерыйскіх сістэмаў, дзясяткі адзінак зенітна-ракетных комплексаў, сотні адзінак гусенічнай і колавай тэхнікі, дзясяткі баявых самалётаў і гелікоптараў, мільён адзінак стралковай зброі і боепрыпасаў розных калібраў, тысячы ракетаў.
,,«Названага ўзбраення вельмі бракавала сілам абароны Украіны на пачатку ваеннай агрэсіі РФ у лютым 2014 года, бракуе і дагэтуль», – заявілі ў пракуратуры.
Паводле яе, названыя міністры абароны «нанеслі шкоду суверэнітэту, тэрытарыяльнай цэласці і недатыкальнасці, абараназдольнасці, дзяржаўнай бяспецы Украіны, а таксама аказалі дапамогу ў правядзенні падступнай дзейнасці супраць Украіны».
Міністры абароны, якія займалі пасады з сакавіка 2010 да люташа 2014 года, – гэта Міхаіл Ежэль, Дзмітрый Саламацін і Павел Лебедзеў. Усе яны ўваходзілі ў адміністрацыю Віктара Януковіча.
У красавіку 2013 года Януковіч прызначыў Ежэля амбасадарам у Беларусі. Сваю пасаду ён страціў у траўні 2015 года. Перад тым Генеральная пракуратура Украіны адкрыла супраць палітыка больш як 50 крымінальных справаў за актыўны ўдзел у знішчэнні тылавога забеспячэння ўкраінскай арміі. Ежэля абвясцілі ў вышук, але ён застаўся ў Беларусі, дзе, паводле ўкраінскай выведкі, атрымаў статус уцекача.
У 2022 годзе Ежэлю выставілі абвінавачванне ва ўзгадненні падпісання харкаўскіх пагадненняў, якія стварылі ўмовы для перабывання Чарнаморскага флоту Расеі ў Крыме.
Якуб Хруст belsat.eu
