5 чэрвеня Менск, як і іншыя гарады, сутыкнуўся з моцнаю паводкаю. Журналісты рэгіянальнага тэлеграм-каналу «This Minsk Media» назвалі тры галоўныя прычыны таго, чаму гэта адбываецца, «нягледзячы на рэгулярныя запэўніванні гарадскіх уладаў пра гатовасць да стыхіі».
Першая прычына, паводле выдання, чаму Менск не дае рады з надвор’ем, заключаецца ў тым, што ліўневая каналізацыя сталіцы састарэла і не спраўляецца з сучаснымі нагрузкамі.
«У некаторых раёнах ліўнёўкі не рамантаваліся з савецкага часу, а іх прапускная здольнасць даўно не адпавядае бягучым рэаліям. Трубы часта аказваюцца забітыя смеццем, лістотай і пяском», – заявілі журналісты.
Другая прычына – значнае скарачэнне за апошнія гады ў Менску зялёных зонаў, якія былі замененыя асфальтам і брукам. У выніку дажджавая вада не ўбіраецца ў глебу, а сцякае на дарогі і тратуары, «перагружаючы і без таго слабую ліўневую сістэму».
Трэцім фактарам назвалі кліматычныя змены, бо, паводле метэаралагічных службаў, за апошнія гады ў Беларусі пачасціліся экстрэмальныя з'явы надвор'я.
