Прэсавая служба польскага Агенцтва ўнутранай бяспекі (ABW) пракаментавала «Белсату» рассылку лістоў нібыта ад яе імя беларусам у Польшчы з патрабаваннем тэрмінова пакінуць межы краіны. У спецслужбе назвалі такія паведамленні дэзынфармацыяй.
У ABW пацвердзілі факт «фальшывай карэспандэнцыі, нібыта падпісанай намеснікам начальніка Агенцтва ўнутранай бяспекі, адрасаванай замежнікам, якія знаходзяцца на тэрыторыі Рэспублікі Польшча».
,,«Ніводзін з выяўленых лістоў не мае прыкметаў афіцыйнага ліста, і, акрамя таго, яны змяшчаюць спасылкі на састарэлыя або неабавязковыя правілы», – гаворыцца ў адказе.
У Польшчы прайшла серыя ператрусаў супраць прарасейскай шпіёнскай сеткі
Чытайце таксама:
Беларускія спецслужбы купілі ў Польшчы дзве машыны на імя Рамана Пратасевіча – «Gazeta Wyborcza»
У польскім ведамстве таксама адзначылі, што праінфармавалі адрасатаў аб тым, што атрыманая імі карэспандэнцыя не паходзіць ад Агенцтва ўнутранай бяспекі. І што адпраўка любых лістоў адносна адміністрацыйных пастановаў, якія датычаць замежнікаў, не ўваходзіць у кампетэнцыю агенцтва.
«Вышэйназваныя дзеянні ёсць дэзынфармацыяй і могуць мець на мэце выклікаць грамадскі неспакой», – гаворыцца ў адказе.
Нагадаем, што 22 і 23 траўня прынамсі два беларусы ў Польшчы – у Гданьску і Варшаве – атрымалі дзіўныя лісты ад імя спецслужбаў з патрабаваннем пакінуць краіну. У лістах, падпісаных нібыта намеснікам начальніка ABW, гаворыцца, што адрасату анулявалі ягоны від на жыхарства праз ягоную незаконную дзейнасць у Польшчы і што яму трэба пакінуць краіну цягам 10 дзён. Інакш пагражаюць прымусова выслаць у Беларусь.
Абодва лісты мелі абсалютна аднолькавы змест і не ўтрымлівалі ніякіх асабістых звестак атрымальнікаў. Яны былі адпраўленыя з Нямеччыны 14 траўня. Адпраўнік не пазначаны. У абодвух выпадках атрымальнікі лістоў – гэта людзі, якія вядуць камерцыйную дзейнасць, таму іхныя адрасы і грамадзянства можна адшукаць у адкрытым доступе. Адзін атрымальнік ліста, якога нібыта пазбаўляюць ВНЖ, ужо мае польскае грамадзянства.
Падобныя выпадкі раней здараліся ў Літве. Там 28 лютага 2024 года некаторыя беларусы пачалі скардзіцца на тэлефанаванні нібыта з Дэпартаменту міграцыі. Ім заяўлялі, што іхны статус перагледжаны і зараз іх дэпартуюць. У ведамстве назвалі тэлефанаванні «дэзынфармацыяй і спробай пасеяць паніку». Там заявілі, што не маюць дачынення да такіх званкоў і ўвогуле не апавяшчаюць людзей пра такія рэчы праз тэлефон.
Сёлета Дэпартамент дзяржаўнай бяспекі Літвы заявіў, што з 2023 года беларуская і расейская выведкі вядуць актыўную інфармацыйна-псіхалагічную аперацыю супраць беларускай дыяспары і літоўскага грамадства. Мэта – распаліць этнічную напружанасць, сфармаваць вобраз Літвы як ксенафобнай дзяржавы і стварыць пагрозу для беларусаў, якія знайшлі прытулак у гэтай краіне.
Якуб Хруст, Дар'я Форман belsat.eu
