Пайшоў з жыцця былы палітзняволены Аляксандр Класкоўскі. Яму было 46 гадоў.
Пра смерць свайго брата паведаміла на старонцы ў Facebook Вольга Класкоўская, якая таксама некалі была палітзняволенай.
«Вось і ўсё. Няма ў мяне больш брата. Саша сышоў у лепшы свет ва ўзросце 46 гадоў», – напісала яна.
Паводле Вольгі, прычынаю смерці, хутчэй за ўсё, быў сэрцавы прыступ. Цела знайшлі суседзі каля дому, прызначаная экспертыза.
Аляксандр Класкоўскі – сын вядомых журналістаў Аляксандра і Людмілы Класкоўскіх. У 1999 годзе ён працаваў інспектарам ДАІ, служыў у міліцыі, якую пакінуў у 2005 годзе ў званні старэйшага лейтэнанта.
Праваабаронцы адзначаюць, што падчас пратэстаў супраць фальсіфікацыі прэзідэнцкіх выбараў у снежні 2010 года Аляксандр выйшаў на плошчу Незалежнасці ў міліцэйскай форме і спрачаўся з сілавікамі.
Яго затрымалі 21 снежня і абвінавацілі ва ўдзеле ў масавых беспарадках. У траўні 2011 года ён быў засуджаны на 5 гадоў пазбаўлення волі, але ўжо ў верасні таго ж года выйшаў на волю ў рамках памілавання.
Пасля падзеяў 2020 года ён пакінуў Беларусь і жыў у ЗША. У яго засталіся трое дзяцей.
Рэдакцыя «Белсату» выказвае шчырыя спачуванні родным і блізкім Аляксандра.
Раман Шавель belsat.eu
