Прэс-сакратар Міністэрства замежных справаў Беларусі Руслан Варанкоў адказаў на пытанне ТАСС пра вызваленне асуджанага ў справе аб змове з мэтай захопу ўлады юрыста Юрыя Зянковіча, які, акрамя беларускага, мае грамадзянства ЗША.
«Для цяперашняй адміністрацыі прэзідэнта ЗША было важна, каб спадар Зянковіч, які быў у вызначаным парадку прызнаны вінаватым у здзяйсненні цяжкіх злачынстваў на тэрыторыі Рэспублікі Беларусь, быў вызвалены. Зразумела, гэта было зробленае ў выніку чыстасардэчнага прызнання і звароту на адрас кіраўніка дзяржавы аб памілаванні», – сказаў Руслан Варанкоў.
Паводле яго, улады Беларусі бачаць «патэнцыял узаемадзеяння з цяперашняй адміністрацыяй ЗША і адкрытыя да дыялогу ва ўсіх кірунках супрацы».
Амерыканскі юрыст і беларускі актывіст Юрась Зянковіч быў арыштаваны ў Маскве ў 2021 годзе паводле абвінавачвання ў замаху на Лукашэнку і дастаўлены ў Менск. Яго пакаралі ў межах «справы змоўцаў» паводле шэрагу крымінальных артыкулаў 11 гадамі калоніі ва ўмовах узмоцненага рэжыму. У гэтай справе праходзілі таксама літаратуразнаўца і палітолаг Аляксандр Фядута, старшыня Партыі БНФ Рыгор Кастусёў – кожнаму з іх прысудзілі 10 гадоў. У судзе Фядуту, Кастусёва і Зянковіча назвалі вінаватымі ў змове з мэтаю захапіць дзяржаўную ўладу неканстытуцыйным шляхам. Праваабаронцы прызналі іх палітычнымі зняволенымі.
КДБ заявіў, што нібыта перадухіліў замах на Лукашэнку і ягоных сыноў, а таксама «раскрыў дзяржаўны пераварот».
Зянковіч быў вызвалены 30 красавіка 2025 года. Дзяржаўны сакратар ЗША Маркаў Руб’ёў паведаміў, што «Беларусь вызваліла яшчэ аднаго несправядліва затрыманага грамадзяніна ЗША».
Якуб Хруст belsat.eu
