Расейская і ўкраінская дэлегацыя ўжо прыбылі ў Стамбул. Перад гэтым украінскі бок прэзентаваў асноўныя прынцыпы перамоваў з расейцамі.
Дэлегацыі, як і на мінулых перамовах 16 траўня, будуць ачольваць міністр абароны Украіны Рустэм Умераў і памочнік расейскага прэзідэнта Уладзімір Мядзінскі.
Украінскі бок збіраецца прэзентаваць дэлегацыі РФ сваю дарожную мапу для дасягнення трывалага мірнага ўрэгулявання.
Згодна з гэтым планам, Масква і Кіеў пры ўдзеле Злучаных Штатаў і Еўразвязу будуць выпрацоўваць прымальныя ўмовы для спынення вайны.
Паводле ўкраінскіх чыноўнікаў, гэты план быў накіраваны расейскаму боку да пачатку перамоваў у Стамбуле.
Выданню «Reuters» сталі вядомыя пункты, якія ўтрымліваюцца ў плане. Як адзначае выданне, яны ў значнай ступені супадаюць з умовамі, якія раней прапаноўваў Кіеў.
Асноўныя прынцыпы і падыходы да перамоваў можна звесці да наступных пунктаў.
- Поўнае і безумоўнае спыненне агню – у паветры, на сушы і на моры. Гэта мусіць быць асновай для пачатку мірнага працэсу.
- Гуманітарныя крокі для ўмацавання даверу – вяртанне ўсіх выкрадзеных і вывезеных дзяцей, абмен палоннымі паводле прынцыпу «ўсе на ўсіх», вызваленне ўсіх цывільных закладнікаў.
- Забеспячэнне трывалага міру – перамовы маюць на мэце не проста прыпыненне вайны, а стварэнне механізмаў, што выключаюць яе паўтор.
- Міжнародныя гарантыі бяспекі – Украіна патрабуе рэальных гарантыяў сваёй бяспекі. У перамовах павінны ўдзельнічаць міжнародныя партнёры, якія возьмуць на сябе частку адказнасці за выкананне дамоўленасцяў.
- Суверэнітэт Украіны – Украіна захоўвае права самастойна вызначаць сваю замежную палітыку, у тым ліку далучэнне да ЕЗ і NATO. Ніякіх абмежаванняў на колькасць і размяшчэнне ўкраінскіх войскаў быць не павінна.
- Пытанні тэрыторыяў – акупаваныя Расеяй тэрыторыі з 2014 года не прызнаюцца. Абмеркаванне межаў магчымае толькі пасля поўнага спынення агню.
- Санкцыі – іх могуць паступова здымаць, але з умовай аднаўлення, калі Расея парушыць дамоўленасці. Замарожаныя актывы Расеі будуць выкарыстаныя для аднаўлення Украіны або застануцца замарожанымі да выплаты рэпарацыяў.
- Рэалізацыя пагадненняў – патрэбная дакладная дарожная мапа з гарантыямі выканання.
Згодна з паведамленнямі турэцкіх медыяў, у перамовах возьме ўдзел кіраўніцтва МЗС і выведкі Турэччыны.
Раман Шавель belsat.eu
