Кампанія X, якую ўзначальвае Ілан Маск, запускае новую сістэму абмену паведамленнямі пад назвай «XChat». Сэрвіс падтрымлівае шыфраваныя паведамленні, аўдыя- і відэазванкі, а таксама перадачу любых тыпаў файлаў.
Анонс запуску новага мэсэнджару Маск зрабіў 31 траўня. І калі глядзець на апісанне, то «XChat» можа скласці канкурэнцыю «Telegram».
,,«Мы запускаем зусім новы "XChat" з шыфраваннем, паведамленнямі, якія знікаюць, і магчымасцю адпраўляць любыя файлы. Таксама ёсць аўдыя- і відэазванкі. Ён пабудаваны на "Rust" з шыфраваннем у стылі "Bitcoin", гэта зусім новая архітэктура», – адзначае Ілан Маск у сваіх допісах у сацсетцы Х.
«XChat» прапаноўвае скразное шыфраванне, што забяспечвае высокі ўзровень абароны звестак. На старце ён будзе даступны толькі карыстальнікам з платнай падпіскай.
Асаблівасцю новага мэсэнджару ёсць магчымасць званкоў без выкарыстання нумару тэлефона, што адрознівае яго ад такіх канкурэнтаў, як «WhatsApp» і «Telegram».
«Вы можаце рабіць аўдыя- і відэазванкі без нумара тэлефона на ўсіх платформах», – кажа Маск.
Запуск «XChat» ёсць часткаю больш шырокай стратэгіі Маска, накіраванай на пераўтварэнне платформы X ва ўніверсальную праграму, якая аб’ядноўвае функцыі сацсеткі, мэсэнджару і іншых лічбавых сэрвісаў.
Раман Шавель belsat.eu
