У суботу, 24 траўня, у Нямеччыне назіраўся ўнікальны энергетычны феномен: цэны на электрычнасць на працягу сямі гадзінаў не толькі ўпалі да нуля, але і апусціліся ніжэй – да мінус 13,17 еўра за мегават-гадзіну. Пра гэта паведамляе «Bloomberg».
Прычына такой з'явы – у спрыяльных умовах надвор’я. Моцны вецер разам з сонечнаю вясною рэзка павялічылі вытворчасць аднаўляльнай энергіі – ветравой і сонечнай. У выніку ў электрасетках аказалася больш энергіі, чымся маглі спажыць карыстальнікі.
У адрозненне ад нафты ці газу, электрычнасці нельга захоўваць у вялікіх аб'ёмах. Калі попыт ніжэйшы за прапанову, а магутных акумулятараў для назапашвання пакуль няма, вытворцам даводзіцца даплочваць, каб нехта забраў электраэнергію з сеткі. Гэта і прыводзіць да адмоўных цэнаў.
Такая з'ява для Нямеччыны зусім не рэдкасць. Краіна лідаруе ў Еўропе ў выкарыстанні аднаўляльных крыніцаў. У 2023 годзе амаль 52 % усяго электразабеспячэння прыходзілася на энергію ветру, сонца, біямасы і г. д. Падобныя скокі цэнаў здараюцца некалькі разоў на год – пераважна ў перыяды з нізкім спажываннем (напрыклад, у выхадныя) і высокай генерацыяй.
У 2020-м у Нямеччыне адмоўныя цэны на электраэнергію назіраліся на працягу больш як 300 гадзінаў за год.
Такія сітуацыі – выклік для еўрапейскай энергетычнай сістэмы. З аднаго боку, яны сведчаць пра поспехі зялёнага пераходу. З другога – паказваюць на вострую патрэбу ў мадэрнізацыі сетак і стварэнні эфектыўных сістэмаў назапашвання лішкаў энергіі.
Раман Шавель belsat.eu
