У судзе Першамайскага раёну Менску сёння разглядаюць справу Ніны Багінскай. Яе абвінавацілі ў «неаднаразовым парушэнні парадку арганізацыі ці правядзення акцыяў». Журналістка Любоў Лунёва паведаміла «Белсату», што ўсе пратаколы, за якія цяпер судзяць актывістку, былі складзеныя пасля званкоў у міліцыю «пільных» мінакоў.
«Я так разумею, міліцыянтам папросту гэта ўжо надакучыла», – сказала «Белсату» журналістка Любоў Лунёва, каментуючы крымінальны пераслед Ніны Багінскай. Актывістку судзяць за «неаднаразовае парушэнне парадку арганізацыі ці правядзення акцыяў». Цягам апошніх гадоў яе не раз затрымлівалі і складалі на яе пратаколы – то за плакат з надпісам «БНФ», то за бел-чырвона-белы значок, то за вопратку з лозунгам «Не вайне».
Паводле артыкулу 342-2 Крымінальнага кодэксу Багінскай пагражае арышт або абмежаванне ці пазбаўленне волі на тэрмін да трох гадоў. Справу разглядаюць у судзе Першамайскага раёну Менску.
Амбасада Нямеччыны ў Беларусі паведаміла, што да будынку суда прыехалі прадстаўнікі дыпламатычных місіяў на знак салідарнасці з Багінскаю. «Абвінавачванні супраць яе несправядлівыя і палітычна матываваныя», – адзначаецца ў заяве.
Як расказала Лунёва, 78-гадовая актывістка цяпер ледзь не штодня ходзіць на працэдуры ў паліклініку.
«У яе вельмі сур'ёзныя праблемы з каленямі з увогуле з усімі суставамі. Да таго ў яе ёсць шэраг вельмі цяжкіх хранічных захворванняў. І тут узнікае пытанне, якое ўвогуле медычнае абслугоўванне ў калоніях, і мы ўсе ведаем адказ на гэтае пытанне. Таму, можа, суддзя заплюшчыць вочы і дасць гэтую „хатнюю хімію“», – разважае журналістка.
Аднак асоба, асуджаная на абмежаванне волі, мусіць быць працаўладкаваная, адзначае суразмоўніца «Белсату»:
«Чалавек, якому далі „хімію“, мусіць цягам двух месяцаў знайсці сабе працу. У законе напісана, што ён мусіць быць працаўладкаваны. Асобе пад 80 – хто яе на якую працу возьме? І што ў такім выпадку адбываецца – чалавека могуць папросту адправіць адбываць гэтае пакаранне на зону».
Як зазначае журналістка, суд улічвае пакаянне і можа даць самае мяккае пакаранне, аднак у выпадку з сімвалам пратэстаў гэтага чакаць не выпадае:
«Мы ж разумеем, што Ніна Багінская не будзе падаць на калені і казаць, што „чорт паблытаў“. Спадарыня Ніна баец. Не дарма яна стала сімвалам пратэстаў».
Лунёва наракае, што летась Багінскую затрымлівалі не патрулі, што проста пабачылі яе на вуліцы. Міліцыянтаў выклікалі «пільныя» грамадзяне:
«Апошні пратакол быў за майку „Не вайне“. Яна выходзіла са станцыі метро „Уручча“, каб ехаць на сваё лецішча. Вось тут яе затрымалі. І ведаеце, што самае прыкрае: у кожным выпадку яна ніколі, як кажуць, не напаролася на патруль. Яе здавалі людзі, мінакі. Разумееце, чалавек убачыў, што ў яе там малюсенькі значок на каўнерчыку і што робіць гэты грамадзянін? Ён выяўляе сваю, так сказаць, „грамадскую пільнасць“. Ён тэлефануе ў міліцыю».
Апошняе затрыманне за антываенны лозунг журналістка назвала «самым красамоўным»:
,,«У чалавека напісаны такі пацыфіст лозунг – „Не вайне“. І што сказалі міліцыянты пасля таго, як параіліся праз тэлефон з кіраўніцтвам? Што гэта супярэчыць палітыцы нашай дзяржавы».
Пры гэтым, як падкрэслівае Лунёва, Багінскую на вуліцах пазнаюць, вітаюць, з ёй размаўляюць:
«Вядома ж, людзі часам з ёй вітаюцца, размаўляюць з ёю ў тралейбусе, паказваюць ёй „вікторыю“. Яна гэта бачыць, яна гэта адчувае. Але вось усе гэтыя пратаколы – гэта таксама грамадзяне Беларусі, якія паказалі сваю „пільнасць“».
Сцяпан Кубік belsat.eu
