У Беларусі істотна вырасла колькасць ахвяраў у пажарах. Гэта вынікае са зводнай табліцы Міністэрства надзвычайных сітуацыяў, увагу на якую звярнула выданне «Позірк».
Станам на 28 траўня з пачатку 2025 года ахвярамі пажараў у Беларусі сталі 300 чалавек супраць 252 за той жа перыяд 2024-га. То бок колькасць загінулых вырасла на 48 асобаў, або 19 %.
Колькасць загінулых у пажарах дзяцей зменшылася ўдвая (з 6 да 3), траўмаваных асобаў – вырасла на 9,2 % (з 217 да 237), уратаваных – зменшылася на 5,8 % (з 207 да 195).
«Позірк» адзначае, што неаднаразова фіксаваў на заніжэнне статыстыкі смяротнасці ў пажарах у зводках МНС. Гэтак, у зводцы за 16 траўня паведамлялася, што з пачатку года ў пажарах загінулі 282 асобы. На наступны дзень ведамства адрапартавала пра аднаго загінулага за содні, аднак у абагульненай табліцы фігуравалі не 283 ахвяры, а 281.
У пачатку траўня арганізацыя «BELPOL» падзялілася з «Белсатам» лістом першага намесніка міністра надзвычайных сітуацыяў Аляксандра Худалеева віцэ-прэм’еру Анатолю Сіваку пра істотны рост колькасці пажараў.
У І квартале 2025 года колькасць пажараў у Беларусі вырасла ў параўнанні з тым жа кварталам 2024-га на 36,1 % (з 1451 да 1975), а колькасць загінулых ад пажараў – на 35,3 % (з 156 да 211). Рост колькасці пажараў паўсюдны: ад 11,3 % у Віцебскай вобласці да 65,6 % у Гарадзенскай. Таксама паўсюдна вырасла колькасць загінулых у пажарах.
Асноўныя прычыны пажараў – неасцярожнае абыходжанне з агнём (36,3 % выпадкаў), парушэнне правілаў усталявання і эксплуатацыі печаў ды ацяпляльных прыладаў (25,8 %) і парушэнне правілаў электрычнага абсталявання (25 %). Абсалютная бальшыня загінулых – у пажарах праз неасцярожнае абыходжанне з агнём (71,1 % загінулых).
Якуб Хруст
