Андрэй А., прозвішча якога раней не называлі, выявіўся начальнікам 9-га галоўнага ўпраўлення КДБ.
У верасні 2024 года суд у Варшаве завочна арыштаваў трох беларусаў у справе аб тэрарызме ў сувязі з захопам самалёта «Ryanair» у 2021 годзе. Паведамлялася, што гэта начальнік Беларускай аэранавігацыі Леанід Чуро, начальнік змены кантролю палётаў Яўген Цыганоў і афіцэр КДБ Андрэй А., прозвішча якога не называлі. У студзені 2025 года Інтэрпол выдаў «чырвонае апавяшчэнне» на іхны вышук. Але прозвішча афіцэра КДБ Андрэя А. М. так і не агучылі – толькі першую літару.
Прэс-сакратар Нацыянальнай пракуратуры Польшчы паведаміў «Белсату», што трэці чалавек у вышуку – начальнік 9-га галоўнага ўпраўлення Камітэту дзяржаўнай бяспекі Беларусі Андрэй Анатольевіч Мыцько.
У пракуратуры таксама расказалі, што арышту гэтых трох асобаў будуць дамагацца праз Інтэрпол і еўрапейскія ордары на арышт, а звяртацца ў Беларусь праз механізмы міжнароднай супрацы не збіраюцца.
Пра Андрэя Мыцько вядома мала. У 2008 годзе яго называлі намеснікам начальніка аднаго з аддзелаў КДБ. Адметна, што справа тады была звязаная з карупцыяй на будаўніцтве, у тым ліку Нацыянальнага аэрапорту «Менск»: замаўлялі амерыканскія кампазітныя алюмініевыя панэлі для фасаду, а паставілі няякасныя беларускія.
У «Воку Змагара» – праекце «Кіберпартызанаў» у пошуку сілавікоў – пазначана, што Андрэй Анатольевіч Мыцько працуе ў КДБ, нарадзіўся 11 жніўня 1973 года. Больш пра яго звестак няма.
У «BELPOL» пацвердзілі «Белсату», што такі чалавек сапраўды ёсць работнікам КДБ (в/ч 10091) і мае такое фота, як у базе «Кіберпартызанаў». Але якая ў яго пасада цяпер, дакладна невядома. У 2006-м ён быў намеснікам начальніка аднаго з падраздзелаў у пытаннях эканомікі КДБ, а на 2021 год мог зрабіцца ўжо і кіраўніком 9-га ўпраўлення, дадаюць у «BELPOL».
Дзявятае ўпраўленне – гэта ўпраўленне эканамічнай бяспекі, расказалі ў «BELPOL». Дэпартамент авіяцыі – гэта «іхны аб’ект», кажуць у аб’яднанні.
***
23 траўня 2021 года самалёт «Boeing 737», які ляцеў з Афінаў у Вільню, развярнулі ў паветры над Беларуссю і пасадзілі ў менскім аэрапорце. На зямлі затрымалі блогера Рамана Пратасевіча і ягоную дзяўчыну Соф’ю Сапегу. У 2023 годзе іх асудзілі і неўзабаве амніставалі. Сапега пакінула Беларусь, Пратасевіч застаўся ў Беларусі і пачаў працаваць на дзяржаўную прапаганду.
Улады Беларусі тлумачылі захоп самалёта тым, што атрымалі паведамленне пра бомбу на борце нібы ад тэрарыстаў «Хамас». Гэтую версію зняпраўджвалі запісы размоваў і час высылання паведамленняў. У снежні 2021 года сталася вядома, што яшчэ ўлетку з Беларусі ў Польшчу ўцёк авіядыспетчар, які даў доказы таго, што захоп самалёта быў аперацыяй спецслужбаў дзеля арышту Пратасевіча. Аперацыю ў дыспетчарскай кантраляваў працаўнік Камітэту дзяржаўнай бяспекі, а за Пратасевічам сачыў выведнік.
Дар’я Форман, Алесь Наваборскі belsat.eu
