Прэзідэнт ЗША Доналд Трамп заявіў, што ён незадаволены дзеяннямі Уладзіміра Пуціна пасля найбуйнейшага паветранага нападу на Украіну.
26 траўня Доналд Трамп напісаў у сваёй сацсетцы Truth Social, што Пуцін «зусім звар’яцеў».
«У мяне заўсёды былі вельмі добрыя адносіны з Уладзімірам Пуціным з Расеі, але з ім нешта здарылася. Ён зусім звар’яцеў! Ён дарма забівае мноства людзей, і я кажу не толькі аб салдатах. Ракеты і беспілотнікі скідваюцца на гарады Украіны без усялякай прычыны. (…) Гэта вайна, якая ніколі б не пачалася, калі б я быў прэзідэнтам. Гэта вайна Зяленскага, Пуціна і Байдэна, а не «Трампа», я толькі дапамагаю тушыць вялікія і выродлівыя пажары, якія былі пачаты з-за абуральнай некампетэнтнасці і нянавісці», — напісаў Трамп.
Аднак у гэты ж час Трамп рэзка выказаўся не толькі ў адрас Пуціна і былога прэзідэнта ЗША Джо Байдэна, а таксама і супраць прэзідэнта Украіны Уладзіміра Зяленскага: «Усё, што ён кажа, стварае праблемы, мне гэта не падабаецца, і лепш бы гэта спынілася».
На пытанне пра тое, ці разглядае ён магчымасць узмацнення санкцый ЗША ў дачыненні да Расеі, Трамп падчас выступу ў Нью-Джэрсі ў нядзелю ўвечары, адказаў: «Безумоўна». Праўда, ён ужо неаднаразова пагражаў санкцыямі, але так і не ўвёў нічога ў дачыненні да Расеі. У гэты час Еўропа ўжо рыхтуе наступны пакет санкцый.
Акрамя таго, на мінулым тыдні Трамп (які абяцаў скончыць вайну за дзень, але распачаў новую — гандлёвую) і Уладзімір Пуцін правялі двухгадзінную тэлефонную размову, каб абмеркаваць прапанаванае ЗША пагадненне аб спыненні агню. Па меркаванні Трампа, размова прайшла «вельмі добра»: маўляў, Расея і Украіна «неадкладна пачнуць» перамовы аб спыненні агню і вайны.
А ўночы 24 траўня Расея запусціла па тэрыторыі Украіны 367 беспілотнікаў і ракет. Гэтую паветраную атаку назвалі самай вялікай з тых часоў, як Пуцін пачаў поўнамаштабнае ўварванне ва Украіну ў 2022 годзе. Вядома пра не менш як 12 загінулых.
Раніцай у панядзелак, 26 траўня, у многіх рэгіёнах Украіны зноў прагучалі сірэны, а Расея атакавала дронамі Адэскую вобласць.
Тэса Анэйда belsat.eu
