У ноч на нядзелю, 25 траўня, на паверхні Сонца зафіксаваны магутны выбліск рэнтгенаўскага выпраменьвання класу X – найвышэйшага ў прынятай шкале.
Як паведамляе ТАСС са спасылкай на Інстытут прыкладной геафізікі, выбух адбыўся а 04:52 паводле менскага часу ў месцы групы сонечных плямаў з нумарам 4098 і доўжыўся 17 хвілінаў.
Паводле магутнасці рэнтгенаўскага выпраменьвання сонечныя выбліскі дзеляцца на пяць асноўных класаў: A, B, C, M і X. Кожны наступны клас у 10 разоў мацнейшы за папярэдні. Клас А – самы слабы (ад 10 нанават на квадратны метр), у той час як клас X можа выклікаць сур'ёзныя наступствы на Зямлі. Такія выбухі часта суправаджаюцца выкідамі сонечнай плазмы, якія, дасягаючы нашай планеты, здольныя справакаваць магнітныя буры.
Падобная прыродная зʼява ўжо назіралася некалькі дзён таму – 19 траўня. Тады адмыслоўцы адзначылі, што той выбліск не нясе пагрозы для Зямлі, бо ўзнік на ўскрайку сонечнага дыска. Паводле ацэнак навукоўцаў, толькі надзвычай моцныя выкіды маглі б дасягнуць Зямлі, а імавернасць таго, што актыўная зона, пакуль нябачная з планеты, застанецца да канца тыдня вельмі нізкая.
Эксперты папярэджваюць, што магутныя сонечныя выбліскі могуць уздзейнічаць на працу радыёсувязі, спадарожнікавай навігацыі, а таксама ўплываць на самаадчуванне людзей – асабліва тых, хто ўразлівы да зменаў геамагнітнага поля.
Раман Шавель belsat.eu
