Кіраўнік Агенцтва еўраатлантычнай супрацы Валер Кавалеўскі ў эфіры «Студыі «Белсат» 21 траўня заявіў пра неабходнасць змяняць стратэгію дэмакратычных сілаў адносна вызвалення палітвязняў. У сваю чаргу, прадстаўнік фонду «BYSOL» Зміцер Ягораў расказаў, як можна падтрымліваць зняволеных ужо цяпер.
Валер Кавалеўскі заклікаў адмовіцца ад падыходу, што немагчыма дамагчыся вызвалення палітвязняў да таго, як падзе сённяшняя ўлада ў Беларусі. Ён падкрэсліў, што дэмакратычныя змены ў краіне – гэта задача «не сённяшняга і не заўтрашняга дня», таму чакаць змены ўладаў для вызвалення зняволеных нельга.
Кавалеўскі адзначыў, што з ліпеня 2024 года на волю на падставе так званага памілавання выйшлі больш як 300 палітвязняў, а больш як 2000 палітычных зняволеных цалкам адбылі свой тэрмін.
,,«На сённяшні дзень мы бачым, што актыўныя намаганні ў гэтай сувязі робяць Злучаныя Штаты, што яны завялі дыялог з рэжымам. Зробленая канкрэтная прапанова пра тое, як зняць санкцыі ў абмен на вызваленне значнай колькасці людзей. І я асабіста падтрымліваю гэты падыход», – заявіў ён.
Таксама, дадаў Кавалеўскі, ён разам з Таццянай Хоміч і Вольгай Гарбуновай шукаюць «і іншыя магчымасці, іншыя трэкі дзеля таго, каб вызваляць людзей ужо сёння».
«Але трэба для гэтага карэктаваць палітычную пазіцыю, адмаўляцца ад такой устаноўкі, што немагчыма нічога зрабіць, акрамя таго, каб зрынуць рэжым, і толькі тады будзе магчыма вызваляць людзей», – сказаў ён, назваўшы свой падыход «канструктыўным» і «рэалістычным».
Паводле Кавалеўскага, санкцыі не дасягнулі мэты, «каб змяніць паводзіны Аляксандра Лукашэнкі, ён не вызваляе людзей менавіта праз санкцыі, але ён можа іх вызваляць, калі санкцыі будуць здымацца». Таксама, заявіў ён, санкцыі робяць «значна больш шкоды на сённяшні дзень звычайным беларусам, чым Аляксандру Лукашэнку».
,,«Таму мы гаворым пра тое, што трэба праяўляць гнуткасць і рэалістычнасць у нашых падыходах да пытання вызвалення людзей, бо гэта ёсць нашым абсалютным прыярытэтам. Гэта наш маральны абавязак – выратоўваць людзей з турмаў», – сказаў кіраўнік Агенцтва еўраатлантычнай супрацы.
Кожны можа ўвесці свае санкцыі
Прадстаўнік фонду «BYSOL» Зміцер Ягораў, у сваю чаргу, заявіў, што «кожны з нас можа ўвесці пэўныя санкцыі супраць рэжыму» – праявіць салідарнасць з палітвязнямі:
«Рэжым баіцца салідарнасці. Нашыя санкцыі – гэта дапамога палітвязням. Нашыя санкцыі – падтрымаць дзетак палітвязняў».
Ягораў адзначыў, што ёсць магчымасць падтрымаць фінансава як канкрэтных людзей, гэтак і агульны збор. У апошнім, сярод іншага, збіраюцца грошы, што ідуць на дапамогу палітвязням, якія вызваляюцца. У тым ліку тым, хто вызваляецца паводле так званага памілавання.
,,«Чалавеку не трэба нічога даказваць, распавядаць сваю гісторыю. Мы толькі верыфікуем, што ён сапраўды сядзеў паводле палітычнага артыкулу, за палітычную дзейнасць, адразу максімальна хутка выдаём яму грошы, якія дапамагаюць купіць лекі, абследавацца, зняць мінімальнае жыллё або частку гэтага аплаціць. Гэта тое, што можа зрабіць кожны», – сказаў Ягораў.
Цяпер, дадаў ён, адбываецца вялікі збор на дзяцей палітвязняў – на летнія вакацыі 234 хлопчыкам і дзяўчаткам з сем’яў палітычна зняволеных: «сабралі ўжо больш як палову суму, але яшчэ вельмі шмат бракуе».
Адносна вызвалення палітвязняў Ягораў адзначыў, што для «BYSOL» няважна, як гэта адбываецца – важна, «каб як мага больш людзей як мага хутчэй выйшлі, каб яны найменш гублялі сваё здароўе». І каб «не проста людзі выйшлі, але каб гэты махавік рэпрэсіяў спыніўся».
Нагадаем, што супраць змякчэння санкцыяў у дачыненні ўладаў у Менску выступаюць таксама і суседнія краіны. Гэтак, прэм’ер-міністр Літвы Гінтаўтас Палуцкас хацеў патлумачыць Злучаным Штатам, што магчымае змякчэнне санкцыяў у дачыненні Беларусі было б вялікай памылкай. Паводле яго, у выніку зняцця санкцыяў у NATO «праблемаў не зменшыцца, а толькі паболее». «Ствараць сабе дадатковыя праблемы, фінансуючы тыя рэжымы, якія хочуць ваяваць з краінамі NATO, дакладна няма ніякага сэнсу», – казаў ён.
