Доналд Трамп сказаў еўрапейскім лідарам, што Уладзімір Пуцін цяпер не гатовы спыніць вайну, бо лічыць, што перамагае. Акрамя таго, стала вядома, што новы раўнд перамоваў пра замірэнне ва Украіне адбудзецца ў сярэдзіне чэрвеня ў Ватыкане.
Пра гэта заяўляе «The Wall Street Journal» са спасылкай на тры свае крыніцы, знаёмыя з хадою размовы, якая адбылася паміж Доналдам Трампам і еўрапейскімі лідарамі.
Сказанае Доналдам Трампам супала з даўнім перакананнем еўрапейскіх лідараў адносна Пуціна, але ўпершыню яны пачулі гэта менавіта ад амерыканскага прэзідэнта, адзначае выданне. Пры гэтым словы Трампа супярэчылі ягоным ранейшым публічным заявам, у якіх ён сцвярджаў, быццам Пуцін сапраўды імкнецца да міру.
Белы дом адмовіўся каментаваць сітуацыю і спаслаўся на паведамленне Трампа ў сацыяльных сетках, дзе ён апісаў сваю размову з Пуціным як «выдатную ў тоне і духу». «Калі б гэта было не так, я б сказаў пра гэта цяпер», – заявіў Трамп.
Хаця Трамп, здаецца, і прызнаў, што Пуцін не гатовы да міру, гэта не прымусіла яго дзеяць так, як заклікаюць еўрапейцы і прэзідэнт Украіны Уладзімір Зяленскі, то бок узмацніць барацьбу супраць Расеі, піша «The Wall Street Journal».
Акрамя таго, выданне паведамляе, што новы раўнд перамоваў паміж Украінай і Расеяй адбудзецца ў сярэдзіне чэрвеня на тэрыторыі Ватыкану. Трамп адзначыў, што на іх адправяцца прадстаўнікі ЗША – дзяржсакратар Марка Руб’ё і адмысловы пасланнік Кіт Келаг.
Нагадаем, што прэзідэнт ЗША Доналд Трамп падчас тэлефоннай размовы 19 траўня папрасіў прэзідэнта Расеі Уладзіміра Пуціна падрыхтаваць «мемарандум міру», які «людзі змогуць прыняць», а не такі, што адразу будзе адхілены. Пры гэтым еўрапейскія лідары былі здзіўленыя, што Трамп задаволены вынікам, хоць Пуцін не прапанаваў у размове нічога новага.
Раман Шавель belsat.eu
