Ноччу Расею атакавала больш як сотня беспілотнікаў. Атакі трываюць з сярэдзіны дня 21 траўня, цягам усёй ночы 22 траўня расейскія тэлеграм-каналы паведамляюць пра атакі БПЛА на інфраструктуру некаторых гарадоў. Пад прыцэлам – Масква, Тула.
У Міністэрстве абароны РФ паведамілі, што цягам ночы над рознымі рэгіёнамі Расеі было збіта 105 беспілотнікаў, з іх 35 – над Маскоўскім рэгіёнам.
Мэр Масквы Сяргей Сабянін у ноч на 22 траўня паведамляў пра адбіццё атак: паводле ягоных словаў, было збіта 29 украінскіх БПЛА, запушчаных на расейскую сталіцу.
У маскоўскіх аэрапортах («Шарамецьева», «Дамадзедава», «Жукоўскі») уводзіліся часовыя абмежаванні на прылёт і адлёт самалётаў.
Сёння а пятай раніцы мясцовага часу губернатар Тульскай вобласці Дзмітрый Міляеў паведаміў, што сродкі СПА адбіваюць ужо дзясятую атаку беспілотнікаў, якія трываюць з ночы 21 траўня. Паводле Міляева, у хадзе налёту пацярпелі некалькі дамоў у Туле, два чалавекі атрымалі лёгкія раненні.
Паводле прадстаўніка ўкраінскага Цэнтру супрацьдзеяння дэзінфармацыі Андрэя Каваленкі, «невядомымі дронамі» былі атакаваныя аб'екты ВПК у Маскоўскай і Тульскай вобласцях.
У той жа час Паветраныя сілы ЗСУ ўсю ноч паведамлялі пра атакі расейскіх БПЛА на тэрыторыю Украіны: Харкаў, Чугуеў, Ізюм, Міргарад і іншыя гарады, ракеты ў кірунку Дняпра.
Станам на восьмую гадзіну раніцы менскага часу ў небе над Кіевам прыкмечаныя расейкія БПЛА. Паведамляецца пра некалькі выбухаў.
Раман Шавель belsat.eu
