Лідарка беларускіх дэмакратычных сілаў Святлана Ціханоўская звярнулася да беларусаў у Дзень салідарнасці з палітычнымі вязнямі – 21 траўня.
Паводле кіраўніцы Аб’яднанага пераходнага кабінету, палітвязні былі ў Беларусі заўсёды, але тое, што адбываецца цяпер, – маштабная трагедыя.
,,«Кожны год 21 траўня сэрца сціскаецца ад болю. Гэта Дзень салідарнасці з палітвязнямі. <…> Сёння за кратамі – больш за тысячу чалавек: журналісты і настаўнікі, медыкі і інжынеры, студэнты і пенсіянеры. Аб'ядноўвае іх толькі адно – яны не згодныя жыць у хлусні і гвалце», – кажа Ціханоўская.
Паводле лідаркі дэмакратычных сілаў, важна памятаць, што нават ва ўмовах татальнага кантролю і ціску мы не бездапаможныя. Таму Святлана Ціханоўская заклікае беларусаў:
«Пішыце лісты палітвязням. Нават некалькі цёплых словаў ад незнаёмага чалавека могуць сагрэць душу і падарыць надзею.
Падтрымайце знаёмых, чые сваякі за кратамі. Прынясіце прадукты састарэлым бацькам зняволеных. Пагаварыце з сябрамі, якія сумуюць па сваіх партнёрах. Дайце адчуць, што яны не адны.
Калі вы за мяжою, выкарыстайце магчымасць, каб нагадаць людзям пра сітуацыю ў Беларусі. Рабіце гэта асцярожна, каб не прыцягваць увагу рэжыму да канкрэтных асобаў за кратамі. Удзельнічайце ў акцыях салідарнасці, рабіце пасты онлайн і падтрымлівайце ініцыятывы».
Кожны крок – важны, кожны ліст можа стаць чыёйсьці надзеяй, зазначае абраная прэзідэнтка Беларусі.
,,«Няхай нашая салідарнасць працягвае расці і пашырацца. Няхай ніводзін палітвязень не застанецца самотным. Свабоду палітвязням!», – рэзюмуе Ціханоўская.
Поўны тэкст звароту – па спасылцы.
Беларусы адзначаюць Дзень салідарнасці з палітвязнямі 21 траўня. Гэты дзень выбралі ў гонар палітзняволенага Вітольда Ашурка, які загінуў у Шклоўскай калоніі № 17 21 траўня 2021 года.
Марыя Міхалевіч belsat.eu
