Памёр палітвязень Валянцін Штэрмер. Пра гэта паведамляе «Наша Ніва» са спасылкаю на надзейныя крыніцы. Пры гэтым абставіны трагедыі незразумелыя.
Адзначаецца, што Валянцін Штэрмер памёр у пачатку 2025 года. Невядома дакладна, адбылося гэта ў калоніі ці ў шпіталі – турэмным альбо цывільным.
Палітвязень нарадзіўся 2 лютага 1964 года, то бок на момант смерці яму было 61 ці 62 гады.
Праваабаронцы «Вясны» паведамілі «Белсату», што ім пакуль нічога не вядома пра ягоную смерць.
Паводле «Вясны», Валянціна затрымалі 9 чэрвеня 2023 года і пакаралі паводле трох артыкулаў Крымінальнага кодэксу: «Абраза прэзідэнта Рэспублікі Беларусь» (арт. 368), «Стварэнне экстрэмісцкага фармавання або ўдзел у ім» (арт. 361-1) і «Распальванне варожасці ці варажнечы» (арт. 130).
Яго пакаралі за «8 каментароў на тэму расейскай агрэсіі з абразамі грамадзянаў Расеі», чым ён нібыта «паспрабаваў распаліць нацыянальную варожасць». Таксама паведамлялася пра пакінутыя абразы ў дачыненні Лукашэнкі.
У кастрычніку 2023 года Сяргей Багінскі з Гомельскага абласнога суда пакараў Валянціна 5 гадамі калоніі. Прыкладна праз два месяцы апеляцыйны суд зацвердзіў вырак. Штэрмера ўключылі ў спіс «экстрэмістаў» і «тэрарыстаў».
Пасля гэтага Валянціна этапавалі ў Шклоўскую калонію № 17. У адным атрадзе з ім быў палітвязень Дзмітрый Лукша, які ўлетку 2024 года выйшаў на свабоду па памілаванні. Ён расказаў выданню, што адбывалася з Валянцінам Штэрмерам.
«Валянцін быў вельмі слабы. У калонію ён прыехаў пасля інсульту. Не ведаю, можа, у СІЗА яго скруціла. Яго з каранціну паднялі ўжо ў такім стане. Пры гэтым пры мне яго кінулі ў ШІЗА.
,,З ім вельмі цяжка было ў адным атрадзе менавіта таму, што яму было ўжо вельмі складана жыць, а мянты ўсё яго на працу адпраўлялі. Валянцін вельмі запаволена казаў, дый хадзіў з цяжкасцю. Калі мы ішлі з працы, ён заўсёды адставаў, не паспяваў. Плюс узімку паслізнуўся і ўпаў. У яго быў ці то пералом рукі, ці то вывіх», – сказаў Лукша.
Цяпер начальнік у шклоўскай калоніі – Аляксандр Карніенка. Гэта былы магілёўскі амапавец, які на нейкі час звальняўся з органаў, але пасля аднавіўся на службе. Ён кіруе калоніяй з 2018-га. Менавіта там пры нявысветленых абставінах 21 траўня 2021 года загінуў палітзняволены Вітольд Ашурак.
Валянцін жыў у Гомлі, у засталіся двое дзяцей – дачка і сын. Паводле «Digital Intelligence Team», нарадзіўся ў Хмяльніцкай вобласці Украіны, у Палонным. Пераехаў у Гомель не пазней за 2002 год.
З 2002 да 2009 года Валянцін меў статус індывідуальнага прадпрымальніка, працаваў начальнікам праектна-тэхнічнага аддзелу ў прыватным прадпрыемстве, кіраваў будаўнічаю фірмай «Авангардбізнесрэсурс».
Апошняе месца працы Штэрмера – дзяржаўнае прадпрыемства «Чырвоныя гваздзікі», якое азеляняе і ўпарадкоўвае Гомель і Гомельскую вобласць.
Апошнім часам гэта не адзіная навіна, звязаная з палітвязнямі і смярцямі. Нядаўна памерлі былыя палітзняволеныя Ганна Кандраценка і Тамара Каравай. Хоць гэта адбылося пасля вызвалення, турма моцна пагоршыла іхны стан.
«Гэта сведчанне таго, што турма не заканчваецца, яна працягваецца. І я на ўласныя вочы бачыла, што там робяць з людзьмі…» – расказала былая палітзняволеная Ірына Шчасная.
Арсен Рудэнка belsat.eu
