Ашуканцы стварылі сетку сайтаў і тэлеграм-каналаў, з дапамогай якіх падманваюць беларускіх школьнікаў, якія шукаюць адказы на выпускныя экзамены і цэнтралізаванае тэставанне. Такім чынам крадуць грошы ды асабістыя звесткі і атрымліваюць доступ да прылады, паведамляе Упраўленне супрацьдзеяння кіберзлачыннасці УУС Берасцейскага аблвыканкаму.
Высветленыя больш за дзясятак сайтаў і 20 закрытых Telegram-каналаў, якія прапануюць нібыта «злітыя» адказы на выпускныя экзамены і цэнтралізаванае тэставанне.
«Пры рэгістрацыі на такіх рэсурсах школьнікі рызыкуюць не толькі страціць свае грошы, але і асабістыя звесткі. Ашуканцы выкарыстоўваюць розныя метады для крадзяжу інфармацыі, у тым ліку вірусы, якія могуць атрымаць поўны доступ да прылады карыстальніка.
У выніку падлеткі не толькі губляюць кантроль над сваймі акаўнтамі і паролямі, але і адкрываюць шлях для далейшых ашуканскіх дзеянняў», – адзначаюць ва Упраўленні супрацьдзеяння кіберзлачыннасці УУС Берасцейскага аблвыканкаму.
Ашуканцы ўвесь час прыдумляюць новыя спосабы падманваць беларусаў. Яны называюцца работнікамі банкаў, Нацыянальнага банку, пошты, міліцыі, падрабляюць паведамленні ад родных, развешваюць QR-коды, з дапамогай якіх нібыта можна аплаціць тавары, і нават прыкідаюцца прадстаўнікамі візавых агенцтваў.
Арсен Рудэнка belsat.eu
