15 і 16 траўня сілавікі прыйшлі з ператрусамі ў сеткі крамаў «Еўраопт» і «Дабраном». Але сёння стала вядома, што пад прыцэл трапіла яшчэ адна сетка – гэтым разам крамаў з адзеннем сэканд-хэнд. Гэта можна разглядаць як сістэму ці ўсё ж быў адзінкавы выпадак?
Па каментар «Белсат» звярнуўся да прадстаўніка «BELPOL» Уладзіміра Жыгара.
На думку суразмоўцы, гэта даволі распаўсюджаная практыка сістэмы, калі ў пэўны час нейкую сферу пачынаць проста «пераварочваць», тым самым запужваючы ўсіх астатніх.
,,«Для дзяржавы, якая ў прынцыпе легалізавала карупцыю ў пэўных кірунках, такія сітуацыі – гэта, на жаль, нармальная з’ява, і гэта намёк усім астатнім, каб яны пільнавалі нейкай дыстанцыі», – адзначыў Уладзімір Жыгар.
Суразмоўца падкрэсліў: для гэтай сістэмы нават не патрабуюцца нейкія рэальныя парушэнні, бо ў неправавой дзяржаве іх знойдуць «у любым выпадку», справы будуць заведзеныя, а вінаватых, якія насамрэч такімі не ёсць, пасадзяць у турму.
«Але гэта будзе паказальна для ўсіх астатніх: калі вы выходзіце за межы дапушчальнага або набліжаецеся да гэтых межаў, то вас чакае немінучая расплата», – пракаментаваў прадстаўнік «BELPOL».
У той жа час Уладзімір Жыгар не бачыць сувязі паміж прыходам сілавікоў у сеткі крамаў сэканд-хэнд і ператрусам у «Еўраопце» і «Дабраноме».
,,«Усім вядома, што «Еўраопт» і «Дабраном» доўгі час крышаваліся ці нават цяпер крышуюцца сям’ёю Лукашэнкі. Яны з гэтага маюць пэўныя грошы. І таму тут, хутчэй за ўсё, таксама назіраецца даволі тыповая сітуацыя, калі ў агульны гаманец сям’і пачало паступаць менш, а праблемы, якія сталі з’яўляцца, сталі вельмі сур’ёзна назаляць самому Лукашэнку», – кажа суразмоўца.
Лукашэнку, паводле Жыгара, даводзіцца апраўдвацца за пэўныя рэчы. І такога, як правіла, ён не даруе: таму ўсе гэтыя затрыманні, ператрусы – па вялікім рахунку фармальнасць, бо ўсе гэтыя крамы і кампаніі будуць працягваць сваю дзейнасць. Але любому, хто прыйдзе на месца затрыманых, будзе ясна: «калі менш грошай будзе трапляць у кашалёк сям’і, то ўсё скончыцца так, як і з папярэднімі людзьмі», мяркуе Уладзімір Жыгар.
Нагадаем, што 15 траўня Дэпартамент фінансавых расследаванняў прыйшоў у цэнтральны офіс кампаніі «Еўрагандаль», што валодае сеткай «Еўраопт», а 16-га – і ў офіс «Дабраному». «Еўраопт» і «Дабраном» – дзве самыя буйныя гандлёвыя сеткі ў Беларусі.
Сёння стала вядома, што адзін з топ-менеджараў кампаніі «Еўраопт» выйшаў на свабоду. Гаворка пра Аляксандра Літвіна, брата аднаго з бенефіцыяраў кампаніі. Сам Сяргей Літвін і яшчэ адзін з асноўных уладальнікаў «Еўрагандлю» Уладзімір Васілько больш за 20 гадоў жывуць за мяжою.
Раман Шавель belsat.eu
