У Еўрапейскім Звязе дасягнутая папярэдняя згода на стварэнне маштабнага абароннага крэдытнага фонду ў аб'ёме 150 мільярдаў еўраў. Пра гэта паведамляе «Polskie Radio» са спасылкаю на крыніцы ў Бруселі.
Дамоўленасць пра стварэнне абароннага крэдытнага фонду ў 150 мільярдаў еўраў была дасягнутая на ўзроўні амбасадараў краінаў-чальцоў ЕЗ і стане найважнейшым элементам плана нарошчвання еўрапейскіх абаронных магутнасцяў.
Стварэнне фонду было адным са стратэгічных прыярытэтаў польскага старшынства ў Радзе ЕЗ, і Польшча актыўна прасоўвала ідэю з пачатку года. Праект прадугледжвае наданне льготных крэдытаў краінам-чальцам на інвестыцыі ў абаронна-прамысловы комплекс.
,,«Бяспеку нельга купіць – яе трэба будаваць. Гэтыя 150 мільярдаў еўраў менавіта для гэтага і прызначаны», – заявіў на мінулым тыдні ў Бруселі міністр фінансаў Польшчы Анджэй Даманьскі.
Варшава чакае, што фонд не толькі ўмацуе абараназдольнасць краіны і рэгіёну, але і паскорыць развіццё нацыянальнай эканомікі, стаўшы стымулам для прамысловага росту і занятасці.
Канчатковае зацвярджэнне дакументу павінна адбыцца на наступным тыдні, калі міністры еўрапейскіх справаў 27 краінаў – чальцоў ЕЗ зацвердзяць тэкст пагаднення.
Нагадаем, што амбасадары краінаў Еўрапейскага Звязу таксама ўзгаднілі новы, 17-ы, пакет санкцыяў супраць Расеі, каб абмежаваць яе «доступ да тэхналогіяў для бою» і знізіць даходы.
Што датычыць абароны Еўразвязу, то ў сакавіку старшыня Еўракамісіі Урзуля фон дэр Ляен прэзентавала кіраўнікам дзяржаваў і ўрадаў план пераўзбраення, які, з ейных словаў, дазволіць мабілізаваць да 800 млрд еўраў на ўзмацненне абараназдольнасці Еўропы. Часткай гэтага плану і ёсць стварэнне крэдытнага фонду.
Якуб Хруст belsat.eu
