У Беларусі назіраюцца праблемы праз надвор’е. Рэкі і вадаёмы мялеюць, што выклікае ў тым ліку праблемы ў рыбаводчых гаспадарках. А замаразкі б’юць ужо па пасевах у сельскай гаспадарцы.
Летняя засуха, сухая восень, бясснежная зіма і сціплая на ападкі вясна – усё гэта прывяло да маштабнага абмялення. На Берасцейшчыне ў выніку не сфармавалася веснавая паводка, а ўзровень вады можа наблізіцца да мінімальных значэнняў за ўсю гісторыю метэаназіранняў, перадае СТВ.
Прыпяць упершыню за некалькі дзясяткаў гадоў вясной не выйшла з берагоў. А ў рыбгасе «Сялец» Бярозаўскага раёну, што сілкаваўся водамі ракі Ясельда і ў якім вырошчвалі чвэрць аб’ёмаў беларускай рыбы (карпавыя, асятровыя, сом, шчупак, карась), былі вымушаныя перайсці на ашчадны метад вырошчвання рыбы і асушыць чатыры сажалкі.
,,«На жаль, сёлета гэткая сітуацыя па ўсёй краіне. Калегі мае пры стасунках таксама звяртаюць увагу, што сёння засталіся без вады. І Віцебская вобласць, Паставы, і Менская вобласць, і нашыя Ганцавічы і Палессе, Свіслач маюць дэфіцыт вады», – расказаў Юрый Бажэнаў, дырэктар вопытнага рыбгасу «Сялец».
Азімыя памерзлі, трэба перасяваць
Міністр сельскай гаспадаркі і харчавання Юрый Горлаў у сваю чаргу заявіў «Беларусь 1», што ў выніку травеньскіх замаразкаў ёсць «пэўныя пашкоджанні пасеваў». Тым не менш ён выказаў гатовасць «частку пасеваў перасеяць тымі культурамі, якія нам дазволяць». Паводле яго, «вялікай катастрофы няма», перадае БелТА.
Старшыня Гомельскага аблвыканкаму Іван Крупко жа адзначыў, што пасля вясновых замаразкаў пацярпеў і азімы рапс ды іншыя культуры. Вызначаныя плошчы да перасеву.
,,«Зразумела, што гэта дадатковая нагрузка з улікам апрацавання глебы, унясення мінеральных угнаенняў, дзесьці карэктаванне планаў – з улікам забеспячэння грамадскай жывёлагадоўлі кармамі і выканання дзяржаўнага заказу. Усе мапы і планы скарэктаваныя», – сказаў ён.
Паводле яго, там, дзе загінулі раннія яравыя, азімыя збожжавыя, пасеюць кукурузу.
Нагадаем, што ў Беларусі і так праблемы з гароднінаю. На некаторы час знікала з продажу бульба. Цяпер яна вярнулася, хай і за цэны, якія мала каму падабаюцца (у Польшчы і Літве таннейшая). З’явілася новая праблема: беларусы наракаюць, што цыбуля або знікла, або прадаецца за шалёныя грошы, або малая, гнілая ды памятая.
Якуб Хруст belsat.eu
