У Польшчы пакуль яшчэ не падлічылі 100 % галасоў у першым туры прэзідэнцкіх выбараў. На момант публікацыі апрацаваныя вынікі з 99,75 % участкаў. Пры гэтым у ноч з 18 на 19 траўня былі апублікаваныя вынікі другога апытання «Ipsos» для TVP, TVN24 і «Polsat News» з 90 % участкаў.
Паводле іх, перамогу з 31,2 % атрымаў кандыдат на прэзідэнта ад кіроўнай Грамадзянскай кааліцыі, мэр Варшавы Рафал Тшаскоўскі. Пасля абвяшчэння вынікаў выбараў ён падкрэсліў, што рады перамозе ў першым туры, але цяпер неабходная поўная рашучасць перад другім турам. Паводле Тшаскоўскага, гэта будзе выбар «паміж стабілізацыяй і хаосам, свабодай і ідэалагічнай апрацоўваннем, сумленнасцю і нахабствам». Ён заявіў пра неабходнасць завяршыць рэформы, пачатыя новым урадам у 2023 годзе, і пакараць мінулую кіроўную партыю «Закон і справядлівасць».
Канкурэнцыю яму ў другім туры, што пройдзе 1 чэрвеня, складзе Караль Наўроцкі ад кансерватыўнай партыі «Закон і справядлівасць», які заняў другое месца і набраў 29,7 %. Наўроўцкі назваў гэтыя выбары найменш справядлівымі за апошнія 35 гадоў. Ён заклікаў «усіх, для каго Польшча важная, незалежна ад вашых палітычных поглядаў», падтрымаць сябе ў другім туры. У тым ліку для таго, каб не дапусціць, што ў руках адной палітычнай сілы будуць не толькі Сейм і Сенат, але і пасада прэзідэнта.
Славомір Мэнцэн ад ультраправай «Канфедэрацыі», які заняў трэцяе месца з 14,5 %, назваў вынік найлепшым для свайго руху. Паводле яго, на парламенцкіх выбарах 2027 года «Канфедэрацыя» абавязкова ўвойдзе ў кіроўную кааліцыю. Ён заявіў, што перамог бы Тшаскоўскага ў другім туры, але цяпер вынік выбараў «няясны». Палітык збіраецца выказаць сваё стаўленне да кандыдатаў другога туру 20 траўня.
Чацвёртае месца ў яшчэ аднаго правага кандыдата – Гжэгажа Браўна, 6,3 %. Спікер Сейму, цэнтрыст Шыман Галоўня ад «Трэцяй дарогі», які заняў пятае месца з 4,9 %, заявіў, што неабходна «ў другім туры даць шанец Рафалу Тшаскоўскаму». Пры гэтым дадаўшы, што перад кандыдатам два тыдні цяжкай працы.
Кандыдатка «Новых левых» Магдалена Беят, якая размясцілася на сёмым месцы з 4,1 %, сказала, што вельмі ахвотна б сустрэлася з Тшаскоўскім, каб выказаць яму чаканні выбарнікаў, якія прытрымліваюцца левых поглядаў.
,,«Выбарнікі – гэта не пераходны кубак, які адзін палітык можа перадаць іншым палітыкам. Выбарнікі – гэта мудрыя людзі, якія маюць свае погляды, свае каштоўнасці і будуць галасаваць у адпаведнасці з імі», – адзначыў у сваю чаргу іншы левы кандыдат ад партыі «Разам» Адрыян Зандбэрг, у якога шосты вынік і 4,8 %.
Рэшта з шасці кандыдатаў набрала, паводле апытання, ад 0,1 % да 1,4 % галасоў.
Прафесарка Універсітэту Мікалая Каперніка ў Торуні Марыя Вінцлаўская ў каментары PAP адзначыла, што была здзіўленая невялікаю розніцаю паміж Рафалам Тшаскоўскім і Каралем Наўроцкім. Яна таксама звярнула ўвагу на вельмі слабыя вынікі чальцоў кіроўнай кааліцыі Шымана Галоўні і Магдалены Беят. На ейную думку, лёс выбараў будуць вызначаць прыхільнікі ўльтраправых кандыдатаў Славоміра Мэнцэна і Гжэгажа Браўна.
Якуб Хруст belsat.eu
