Уначы расейскія войскі ўчынілі масавую атаку на Украіну беспілотнікамі. У выніку ўдару ў Кіеўскай вобласці загінула жанчына, пацярпела 4-гадовае дзіця.
ЗСУ паведамляе, што ў ноч на нядзелю Расея запусціла 273 беспілотнікі. Былі збітыя 88 ударных дронаў. 128 беспілотнікаў-імітатараў, якія беспасярэдняй небяспекі не нясуць, аднак адцягваюць на сябе ўвагу СПА, былі «лакацыйна страчаныя без адмоўных наступстваў».
«У выніку варожай атакі пацярпелі Кіеўшчына, Днепрапятроўшчына і Данеччына», – праінфармавалі ў ЗСУ.
У некалькіх раёнах Кіева, паводле гарадской вайсковай адміністрацыі, упалі абломкі збітых беспілотнікаў, былі пашкоджаныя два будынкі. Ніхто не пацярпеў.
Паветраная трывога трывала ў сталіцы Украіны амаль 9 гадзінаў.
У Кіеўскай вобласці ў выніку атакі загінула 28-гадовая жанчына. Дзве дарослыя асобы і адно 4-гадовае дзіця былі параненыя і шпіталізаваныя, паведамілі мясцовыя ўлады.
Праз удары дронаў у рэгіёне пашкоджаныя некалькі жылых дамоў і прадпрыемстваў.
Расея ўчыніла масавую атаку пасля таго, як Доналд Трамп анансаваў тэлефонную размову з Уладзімірам Пуціным 19 траўня. Прэзідэнт ЗША раней заявіў, што без ягоных перамоваў з расейскім палітыкам дамагчыся спынення вайны немагчыма.
Сцяпан Кубік belsat.eu
