Удзень 15 траўня затрымалі адміністратара беларускай «Вікіпедыі» Максіма Лепушэнку, піша «Наша Ніва» са спасылкаю на допіс у Facebook аднаго з ягоных калегаў-вікіпедыстаў.
Максім Лепушэнка – адзін з найстарэйшых дзейных рэдактараў і адміністратараў беларускага раздзелу «Вікіпедыі» – «адпаведны сцяг атрымаў яшчэ ў 2007 годзе», кажуць пра яго калегі. Пісаў у асноўным на тэмы старажытнай гісторыі Беларусі, а таксама сачыў за парадкам і мадэраваў розныя спрэчкі.
Прычыны затрымання Лепушэнкі невядомыя. Ён не першы аўтар і рэдактар беларускай «Вікіпедыі», якога арыштавалі апошнім часам.
Надоечы стала вядома, што 17 красавіка затрымлівалі адміністратарку Вольгу Сітнік, вядомую пад нікам Хомелка. Яе адпусцілі ў той жа дзень, аднак у пачатку траўня зноў узялі пад варту і прысудзілі 10 содняў адміністратыўнага арышту на Акрэсціна.
У снежні 2024 года быў затрыманы Stary Jolup, актыўны рэдактар раздзелу, што вядзецца класічным правапісам.
13 сакавіка 2025 года знік Kazimier Lachnovič (сапраўднае імя невядомае), адзін з чатырох адміністратараў. Сувязь з ім адсутнічае, імаверна, яго затрымалі паводле крымінальнай справы.
Праз тыдзень пасля знікнення Ляхновіча выйшаў прапагандысцкі матэрыял Людмілы Гладкай, у якім прагучала, што «Вікіпедыя» – гэта зброя масавага паражэння супраць краінаў постсавецкай прасторы, а беларускі раздзел рэдагуецца з Польшчы.
Марыя Міхалевіч belsat.eu
