Увечары 14 траўня памежнікі ў Верхнядзвінскім раёне на мяжы з Латвіяй знайшлі цела іншаземкі, сцвярджае Дзяржаўны памежны камітэт Беларусі. Верагодна, яна хацела нелегальна трапіць у ЕЗ.
Паведамляецца, што цела было за 150 метраў ад мяжы ў лясным масіве. Дакументаў і асабістых рэчаў пры ёй не знайшлі.
«За тыдзень гэта другі выпадак гібелі бежанцаў на латвійска-беларускім участку мяжы», – піша Дзяржпамежкамітэт. – На месцы працавала следча-аператыўная група з мэтаю фіксацыі прыкметаў незаконнага выцяснення ўцякачкі сумежным бокам».
Мінулы раз было знойдзенае цела мужчыны, як мяркуецца, з Афганістану.
Паводле Дзяржпамежкамітэту, з 2021 года на мяжы з Еўразвязам загінуў 71 мігрант. 30 з іх былі знойдзеныя на латвійскім кірунку.
Дзяржпамежкамітэт Беларусі звычайна абвінавачвае ў смярцях калегаў з ЕЗ, часам нават сцвярджае, што целы загінулых былі перанесеныя ў Беларусь праз дзверы ў плоце на мяжы з Польшчаю.
Аднак смерці пачаліся з таго часу, як з'явіўся міграцыйны крызіс – з лета 2021 года. Як высветлілі журналісты БРЦ, на міграцыйным крызісе велізарныя грошы зарабляюць людзі, якіх пакрываюць сілавыя ведамствы Беларусі, у тым ліку з Дзяржпамежкамітэту Беларусі.
Арсен Рудэнка belsat.eu
