Нацбанк падлічыў, што цяпер у абарачэнні амаль 12,4 млрд рублёў, гэта на 22 % болей, чымся год таму. Гатоўка – хуткія грошы, якія можна ў адзін момант прынесці ў крамы ці абменнікі, што падчас крызісу можа істотна разагнаць рост цэнаў.
Рух грошай у краіне бачны ў статыстыцы шырокай грашовай масы. Паводле звестак на 1 траўня, цяпер у абарачэнні 12,4 млрд рублёў гатоўкі, рост год да года – 22 %.
Акрамя таго, за год істотна, на 25 %, павялічыліся гэтак званыя пераводныя дэпазіты – гэта грошы на бягучых рахунках беларусаў, груба кажучы, на банкаўскіх картках. Цяпер там 8,2 млрд рублёў.
«Гэта наступства павелічэння прыбыткаў насельніцтва, якія штурхаюць гатоўку і пераводныя дэпазіты ўверх. Паглядзім, што будзе далей. Пераводныя дэпазіты фізічных асобаў апошнія чатыры месяцы то зніжаліся, то рэзка павялічваліся. У красавіку мы бачым такі ўпэўнены прырост», – адзначыла ў каментары «Белсату» эканамістка даследчага цэнтру BEROC Настасся Лузгіна.
Усё гэта – хуткія грошы. Іх імгненна можна выдаткаваць на куплю тавараў або валюты, што ў выпадку фінансавага крызісу яшчэ больш распаліць агонь інфляцыі і дэвальвацыі. І такое ў Беларусі ўжо было, калі людзі штурмавалі крамы і абменнікі, намагаючыся пазбавіцца ад рублёў, якія абясцэньваліся на вачах.
Пры гэтым не менш шпарка раслі тэрміновыя дэпазіты фізічных асобаў, чым не можа не цешыцца Нацбанк. Рэгулятар намагаецца, каб беларусы клалі грошы на даўгія безадзыўныя ўклады: з аднаго боку, гэтыя сродкі пойдуць на крэдыты кампаніям, каб разганяць эканоміку, а з іншага боку, такія дэпазіты амаль немагчыма закрыць заўчасна. Гэтак Нацбанк бароніцца ад фінансавай катастрофы: людзі не змогуць хутка вынесці грошы і абрынуць банкаўскую сістэму.
За год тэрміновыя рублёвыя дэпазіты выраслі на 37 %. Цяпер беларусы трымаюць на гэтых укладах 12,1 млрд рублёў.
«Гэта звязана з тым, што, з аднаго боку, растуць прыбыткі, з іншага – ашчаджэнні ў замежнай валюце не выгадныя. Найбольш выгадна захоўваць у дэпазітах у замежнай валюце», – кажа Лузгіна.
Тым часам пасля трох месяцаў росту ўніз пайшлі валютныя дэпазіты фізічных асобаў. Там цяпер 2,612 млрд долараў, што на 6,9 % ніжэй, чымся год таму.
Яшчэ адзін важны паказнік гэтай статыстыкі Нацбанку – агульная шырокая грашовая маса, што ўлічвае і гатоўку ў абарачэнні, і грошы грамадзянаў ды прадпрыемстваў на рахунках, і дэпазіты, і каштоўныя паперы. Імклівы рост з месяца ў месяц менавіта гэтага паказніку будзе сведчыць, што Нацбанк запусціў друкарскі станок, каб заліць эканоміку незабяспечанымі грашыма. Цяпер такіх прыкметаў няма, наадварот: сёлета шырокая грашовая маса нават двойчы зніжалася.
Сцяпан Кубік belsat.eu
