Еўрапейскі Звяз абмяркоўвае ўвядзенне дадатковых тарыфаў на расейскія тавары, пра гэта паведамляе «Politico» са спасылкаю на крыніцы сярод еўрапейскіх чыноўнікаў.
На саміце Еўрапейскай палітычнай супольнасці ў сталіцы Албаніі, Тыране, 16 траўня палітыкі засяродзяцца на рэзкім узмацненні санкцыяў супраць Масквы, паведамілі выданню чатыры еўрапейскія чыноўнікі.
Паводле двух чыноўнікаў, абмяркоўваюцца дадатковыя тарыфы на расейскі імпарт.
«ЕЗ увёў значныя санкцыі супраць Масквы з таго часу, як яна пачала сваё ўварванне ў 2022 годзе, але ўстрымаўся ад увядзення поўнага гандлёвага эмбарга супраць Расеі», – адзначае «Politico».
Раней міністр замежных справаў Францыі Жан-Наэль Баро заявіў, што еўрапейцам і амерыканцам неабходна «пайсці далей» і «задушыць» расейскую эканоміку, каб прымусіць Уладзіміра Пуціна спыніць вайну ва Украіне.
,,«Мы павінны падрыхтавацца да ўвядзення разбуральных санкцыяў, што могуць задушыць расейскую эканоміку раз і назаўжды», – заявіў ён у інтэрв'ю французскай тэлекампаніі BFMTV.
Са словаў аднаго з прадстаўнікоў ЕЗ, на ўвядзенне новых санкцыяў яго натхніў сенатар-рэспубліканец з ЗША Ліндсі Грэям, які прапанаваў абкласці расейскі экспарт 500-адсоткавымі тарыфамі, калі Уладзімір Пуцін не спыніць агрэсіі ў дачыненні Украіны.
«Мы б натхніліся маштабамі» ягонай прапановы, сказаў чыноўнік.
Калі такія тарыфы на расейскія тавары сапраўды зʼявяцца, то фактычна гэта будзе азначаць гандлёвае эмбарга, бо яны стануцца неймаверна дарагімі для пакупнікоў.
Арсен Рудэнка belsat.eu
