Каардынацыйная рада завяршыла выбары новага спікера на замену зніклай Анжалікі Мельнікавай. Раду ўзначаліць Арцём Брухан – паплечнік Паўла Латушкі.
Каардынацыйная рада 14 траўня выбрала новага спікера. Ім стаў Арцём Брухан ад фракцыі «Каманда Латушкі і Рух «За свабоду». Другое месца заняў Аляксандр Кныровіч ад фракцыі «Беларусы». Іншых кандыдатаў не было.
Як расказаў «Белсату» сябра КР і былы спікер Андрэй Ягораў, за Брухана прагаласавалі 50 сяброў КР, за Кныровіча – 11.
Да гэтага абавязкі абавязкі спікеркі выконвала віцэ-спікерка Стася Гліннік, якая магла стаць спікеркай аўтаматычна пасля знікнення Мельнікавай, згодна з рэгламентам КР, але Гліннік адмовілася.
Арцём Брухан – намеснік кіраўніка Народнага антыкрызіснага ўпраўлення і намеснік прадстаўніка Аб’яднанага пераходнага кабінету. У 2017– 2020 годзе Брухан працаваў у Берасцейскім аблвыканкаме, а перад тым – у мемарыяльным комплексе «Берасцейская крэпасць-герой». Больш за тыдзень ён быў адзіным кандыдатам у спікеры КР.
Спікерка Каардынацыйнай рады Анжаліка Мельнікава перастала выходзіць на сувязь 25 сакавіка. Месяцам раней яна пакінула тэрыторыю Польшчы і Еўразвязу. Вядома, што яна прылятала ў Лондан. Паводле расследавання польскага выдання «Polityka», адтуль яна паляцела на Шры-Ланку. З рахунку фонду Мельнікавай былі пераведзеныя на ейны прыватны рахунак каля 150 тысяч долараў, якія прызначаліся для КР і «Кіберпартызанаў». У Польшчы заведзеная крымінальная справа паводле факту знікнення былой спікеркі Каардынацыйнае рады. Сярод версіяў, што разглядаюцца праваахоўнікамі, – незаконнае пазбаўленне волі.
Брухан публікаваў сваю праграму перад выбарамі спікера. Сярод пунктаў праграмы – стварэнне юрыдычнай асобы для КР каб гэтая асоба належала не аднаму чалавеку, а была асацыяцыяй або ўсіх чальцоў, або нарады фракцыяў. Таксама ён прапаноўваў увесці пасаду другога віцэ-спікера для больш шырокага прадстаўніцтва розных фракцыяў, стварыць бюджэтную камісію КР і дамагчыся справаздачы аб выкарыстанні фінансаў КР мінулага склікання, паставіць у прыярытэт падтрымку беларусаў замежжа, арганізаваць публічныя слуханні Аб’яднанага пераходнага кабінету і іншае.
Алесь Наваборскі belsat.eu
