30 траўня а 10:30 у судзе Першамайскага раёну Менску будзе разглядацца крымінальная справа супраць актывісткі Ніны Багінскай паводле ч. 2 арт. 342 («Неаднаразовае парушэнне закону аб правядзенні масавых мерапрыемстваў»). Пра гэта паведамілі крыніцы «Белсату». Аснову абвінавачання супраць Багінскай складаюць адміністратыўныя пратаколы і судовыя пастановы за 2024 год.
78-гадовая Ніна Багінская стала сімвалам пратэстаў 2020-га. Фатаграфіі, як яна трымае нацыянальны сцяг у руках, публікаваліся ў шматлікіх замежных медыях.
20 кастрычніка 2020 года Аляксандр Лукашэнка каментаваў пераслед актывісткі: «Вы глядзіце толькі, Ніну Багінскую не забірайце з плошчаў. Калі Ніну Багінскую прыбраць, то апазіцыі не будзе. Няма каму хадзіць будзе. Я памятаю Ніну Багінскую, жартам кажу, яна яшчэ хадзіла, у службе бяспекі Пазняка працавала. Ну, малайчына. Яна перакананы чалавек. Яна – перакананы. Так, ейныя погляды кардынальна разыходзяцца з нашымі. Але гэта перакананы чалавек – і яе ні ў якім разе нельга забіраць з вуліцы, бо дэкарацыі знікнуць».
Насамрэч Ніну Багінскую затрымлівалі дзясяткі разоў. Праз шматлікія штрафы ў жанчыны адабралі лецішча і зямельны надзел, а пенсію яна гадамі атрымлівае не ў поўным аб'ёме.
Ніна Багінская мае шэраг цяжкіх захворванняў і патрэбу ў своечасовым медычным лекаванні. У турэмных умовах ейнаму жыццю можа пагражаць сурʼёзная небяспека.
Любоў Лунёва belsat.eu
