Сталася вядома пра смерць былой палітычнай зняволенай Тамары Каравай з Лунінца, якая летась выйшла на волю паводле памілавання. Пра смерць жанчыны «Нашай Ніве» паведамілі ейныя знаёмыя.
Тамара Каравай працавала прыбіральніцай у лунінецкай будаўнічай краме «Справа тэхнікі», пасля стала індывідуальнаю прадпрымальніцай і прадавала на рынку абутак. Апошні час перад арыштам падпрацоўвала сядзелкай.
Замужам жанчына не была, але з грамадзянскім мужам гадавала дзіця. На момант затрымання жанчыны сын быў няпоўнагадовы, цяпер яму 19.
Жыхарку Лунінца суддзя Кацярына Клеўжыц адправіла ў калонію на 2 гады за «паклёп» на Аляксандра Лукашэнку – упадабанне публікацыі ў «Одноклассниках», дзе палітык называўся дыктатарам.
Каравай была ў ліку памілаваных 20 жніўня 2024 года. Яна вызвалілася на тры месяцы раней за прызначаны тэрмін. Дакладная дата смерці невядомая, аднак жанчына была апошні раз онлайн «УКантакце» 23 красавіка 2025-га. Афіцыйна – не вытрымала сэрца.
5 лютага 2025-га пайшла з жыцця 39-гадовая Ганна Кандраценка, асуджаная ў 2022-м за крытычныя каментары на адрас прадстаўнікоў улады і Лукашэнкі. Рак у яе дыягнаставалі яшчэ падчас адбыцця тэрміну ў гомельскай калоніі, але, нягледзячы на цяжкі стан, датэрмінова яе не вызвалілі.
Якуб Хруст belsat.eu
