Прэзідэнт Украіны Уладзімір Зяленскі ў эксклюзіўным інтэрв'ю, апублікаваным у французскім выданні «Libération», расказаў, чаго чакае ад магчымых перамоваў з Расеяй у Стамбуле. Пра гэта паведамляе «Ouest-France».
Уладзімір Зяленскі заявіў, што гатовы сустрэцца з Уладзімірам Пуціным асабіста, калі той пагодзіцца на паездку. «Мы з ім не можам цяпер ува ўсім дамовіцца, гэта немагчыма. [... ] Але мы павінны неяк знайсці фармат, каб пакласці канец вайне», – сказаў Зяленскі, зноў заклікаўшы да неадкладнага спынення агню без папярэдніх умоваў.
Паводле яго, сустрэча не можа быць сімвалічнай:
,,«Калі я сустрэнуся з ім, мы павінны выйсці з гэтага з палітычнай перамогай: спыненнем агню, абменам палоннымі паводле прынцыпу «ўсе на ўсіх» ці нечым накшталт гэтага».
Зяленскі падкрэсліў, што гарантаваць выкананне любога пагаднення могуць толькі вонкавыя пасярэднікі, якім бы давяралі абодва бакі. На ягоную думку, прысутнасць прэзідэнта ЗША Доналда Трампа магла б заахвоціць кіраўніка Расеі здзейсніць паездку: «Калі Пуцін не прыедзе, гэта будзе выглядаць для яго як поўная параза».
Зяленскі адзначыў, што Украіна трымаецца стойка, паток зброі і беспілотнікаў палепшыўся. Ён заклікае да новага раўнду жорсткіх санкцыяў супраць Расеі, у прыватнасці з боку ЗША і Еўрапейскага Звязу. Прэзідэнт Украіны таксама пахваліў адзінства паміж Францыяй, Злучаным Каралеўствам і Нямеччынай, якія, маўляў, утвараюць вельмі актыўную «тройку» – цесна скаардынаванае дыпламатычнае трыа, што застаецца ў сталым кантакце з Кіевам.
Нагадаем, што лідары Францыі, Украіны, Нямеччыны, Польшчы і Вялікай Брытаніі прапанавалі поўнае спыненне агню з 10 траўня, паабяцаўшы ўвесці новыя санкцыі супраць Расеі, калі яна на гэта не пагодзіцца. Аднак Пуцін адмовіўся ад гэтага і прапанаваў перамовы ў Турцыі 15 траўня.
Прэзідэнт Турцыі Рэджэп Эрдаган заявіў, што ягоная краіна гатовая стацца пляцоўкаю для мірных перамоваў паміж Расеяй і Украінай. А прэзідэнт ЗША Трамп запатрабаваў, каб Кіеў неадкладна пагадзіўся на перамовы з Расеяй нават без замірэння.
Прэзідэнт Украіны Зяленскі адказаў на гэта, што першы крок да рэальнага заканчэння вайны – гэта спыненне агню. Аднак на перамовы ў Стамбуле пагадзіўся, выклікаўшы на іх самога Пуціна. Той жа свайго ўдзелу не пацвердзіў.
Якуб Хруст belsat.eu
