У Беларусі махляры выкарыстоўваюць новую схему, каб абакрасці беларусаў. Гэтым разам яны выкарыстоўваюць так званыя лісты шчасця за перавышэнне хуткасці, знаёмыя аўтамабілістам.
Дзеля гэтага махляры дасылаюць уладальнікам аўтаў лісты, у якіх падробліваюць пастанову аб адміністратыўным правапарушэнні Правілаў дарожнага руху, паведамляе канал, блізкі да сілавікоў.
На адваротным баку ліста размяшчаюцца рэквізіты нібыта для аплаты штрафу. Грошы, адпраўленыя на гэты рахунак, трапляюць у рукі махляроў.
У адрозненне ад сапраўднай квітанцыі, на такім бланку ўказаныя розныя электронныя сістэмы прыёму грошай (напрыклад, «Qiwi Кошелёк»).
Нагадаем, што апошнім часам у арсенале злачынцаў з’яўляюцца ўсё новыя спосабы выманьваць грошы: ад званкоў з мэтай анкетавання і заканчваючы запісам на падачу дакументаў на візу. Таму заклікаем беларусаў быць пільнымі.
Раман Шавель belsat.eu
