Новы кіраўнік фонду «Białoruś Liberty» Віталь Пацехін падаў заяву ў праваахоўныя органы Польшчы з увагі на крадзеж грошай з рахункаў. Пра гэта «Белсату» паведаміла старшыня нагляднай рады фонду, прадстаўніца «Кіберпартызанаў» Юліяна Шаметавец.
Віталь Пацехін, які ўзначаліў заснаваны Анжалікаю Мельнікаваю фонд «Białoruś Liberty», нарэшце атрымаў доступ да рахункаў арганізацыі. Фонд апрацоўваў гранты для «Кіберпартызанаў», а ў сярэдзіне сакавіка атрымаў дапамогу ад донара для Каардынацыйнай рады.
Сталася вядомым, што 22 студзеня Мельнікава ўпершыню выдаткавала грошы «Кіберпартызанаў» на асабістыя патрэбы: яна аплаціла паслугі сэрвісу Booking.com.
Старшыня нагляднай рады фонду, прадстаўніца «Кіберпартызанаў» Юліяна Шаметавец сказала «Белсату», што невядома, у якой краіне былая спікерка КР арандавала жытло:
«Не ведаем. Можа, гэта было звязана з імпрэзаю ў Каардынацыйнай радзе».
Пра першыя несанкцыянаваныя трансакцыі даведацца было немагчыма без спрыяння Мельнікавай, сцвярджае Шаметавец:
«Даведаліся б, калі б яна даслала выпіску з рахунку, яна час ад часу на запыты гэта рабіла».
Мельнікава выводзіла грошы на асабісты рахунак невялікімі сумамі цягам лютага і сакавіка. Апошняя трансакцыя адбылася 24 сакавіка.
«Кіберпартызаны» страцілі $ 30 тысячаў, Каардынацыйная рада – $ 107 тысячаў. Агулам Мельнікава, як вынікае з банкаўскай справаздачы, вывела $ 150 тысячаў. Шаметавец раскрыла, што за грошы яшчэ былі на рахунку фонду:
«Гэта быў памылковы перавод ад аднаго з нашых донараў».
Як паведаміла суразмоўца «Белсату», новы кіраўнік «Białoruś Liberty» падаў заяву ў праваахоўныя органы Польшчы паводле факту крадзяжу грошай. Пры гэтым Шаметавец не стала называць Мельнікаву злачынцай:
,,«Мы не можам так казаць, пакуль не будзем ведаць дакладна, пры якіх абставінах яна гэта рабіла. Юрыдычна, вядома ж, гэта былі не ейныя грошы, а грошы фундацыі. Распараджацца імі яна магла толькі на мэты фундацыі і паводле кантракту з донарамі».
Гэта ж у каментары «Белсату» адзначыў прадпрымальнік, вядоўца праграмы «Атмасфера» на YouTube-канале «Белсат News» Аляксандр Кныровіч:
«Тое, што Мельнікава кіравала фондам, не азначае, што гэта ейныя грошы. У шмат якіх краінах гэтак, і ў Польшчы, і ў Беларусі: сродкі пераводзяцца на канкрэтныя мэты, гэта зафіксавана ў дакументах. І выдаткаваць іх куды захочацца нельга».
Такім чынам, паводле бізнесоўцы, вывад грошай з фонду «Białoruś Liberty» выглядае менавіта як раскраданне:
«Прычым трансакцыяў было багата. Для беларускага суда гэта было б сведчаннем злоснага намеру і абцяжарвальнымі абставінамі».
Пры гэтым дасюль невядома, добраахвотна Мельнікава пераводзіла грошы – або пад прымусам ці ў выніку шантажу.
Сцяпан Кубік belsat.eu
