Гандляванні на Беларускай валютна-фондавай біржы 12 траўня скончыліся зніжэннем курсаў долара і юаня, тады як расейскі рубель падаражэў.
Долар патаннеў на 0,75 %, да 3,001 рубля. Апошні раз такім нізкім яго курс быў у чэрвені 2023 года. А курс юаня знізіўся на 0,48 %. 10 юаняў каштуюць 4,1533 рубля.
Расейскі рубель, наадварот, падаражэў на 0,68 %. За 100 расейскіх рублёў даюць 3,69 беларускага. Гандляванняў еўрам не было.
Паводле Нацбанку, з пачатку года амерыканскія грошы патаннелі ў Беларусі на 13,5 %. Эканаміст Ігар Ліпсіц мяркуе, што гэта яшчэ не канец. На ягоную думку, прычына зніжэння курсу долара – наўмысная палітыка Доналда Трампа з мэтай дэвальваваць грошы ЗША. Такім чынам прэзідэнт Злучаных Штатаў намагаецца развязаць праблему замежнага гандлю краіны: зрабіць амерыканскія тавары таннейшымі і больш канкурэнтнымі для купляння за мяжою.
Якуб Хруст belsat.eu
