Вашынгтон і Пекін у выніку перамоваў у Швейцарыі дамовіліся часова знізіць узаемныя мыты на 115 %. Пра гэта гаворыцца ў супольнай заяве бакоў, апублікаванай 12 траўня.
Паводле дамовы, што пачне дзеяць з 14 траўня, ЗША на тэрмін 90 дзён знізяць стаўкі дадатковых мытаў на кітайскія тавары са 145 % да 30 %, а Кітай – са 125 % да 10 % на амерыканскія.
Пасля выканання гэтых дамоўленасцяў бакі створаць механізм для працягу абмеркаванняў эканамічных і гандлёвых стасункаў. Далейшыя дыскусіі паміж імі будуць праходзіць па чарзе ў Кітаі і ЗША ці трэцяй краіне, абранай бакамі. Пры неабходнасці яны могуць праводзіць кансультацыі на працоўным узроўні ў адпаведных эканамічных і гандлёвых пытаннях.
Пагадненне ЗША і Кітаю прывяло да росту рынкаў. Ф'ючэрзы на «S&P 500» падскочылі на 3 %, на тэхналагічны «Nasdaq 100» – амаль на 4 % пасля публікацыі першага пагаднення. Акцыі кітайскіх кампаніяў у Гон-Конгу выраслі на 3 %, піша «The Bell».
Аналітыкі, апытаныя «Bloomberg», называюць пагадненне добраю навіной, але не раяць інвестарам захапляцца. З іншага боку, такі адкат пры захаванні параметраў зніжае сумарную тарыфную нагрузку на ўвесь імпарт ЗША ўдвая, да 10,4 %. Прыкладна ўдвая ён паменшыць і стагфляцыйны ўдар па эканоміцы – да мінус 1,5 % ВУП і плюс 0,9 % да інфляцыі на найбліжэйшыя тры гады.
У пачатку лютага ЗША ўвялі мыты на імпарт з Кітаю памерам 10 %, праз месяц павялічыўшы стаўку ўдвая. Таксама Доналд Трамп абвясціў пра ўвядзенне «люстраных» мытаў, якія для Пекіну склалі 54 %. Кітай увёў захады ў адказ, пасля чаго бакі працягнулі ўзаемна павялічваць стаўкі. Пасля апошняй эскалацыі мыты ЗША для Кітаю складалі 145 %, зваротныя – 125 %. Таксама Пекін абмежаваў экспарт некаторых карысных выкапняў, у тым ліку крытычна важных мінералаў, пасля чаго Белы дом прыгразіў мытамі на 245 %.
Якуб Хруст belsat.eu
