Нацыянальны статыстычны камітэт Беларусі 12 траўня апублікаваў звесткі пра змяненне спажывецкіх цэнаў. Лічбы ўлады не парадуюць, бо істотна апераджаюць паказнікі, запланаваныя на канец года.
Месячная інфляцыі ў красавіку паскорылася да 1 % пасля 0,8 % у сакавіку. У параўнанні з пачаткам года індэкс спажывецкіх цэнаў вырас на 3,8 %, а за год – на 6,5 %. І гэта пры тым, што мэтавы паказнік інфляцыі па выніках 2025 года мае не перавышаць 5 %.
Базавая інфляцыя, якая не ўлічвае сезонных і адміністрацыйна рэгуляваных цэнаў, у красавіку склала 0,8 %, а з пачатку года – 3 %.
За месяц цэны на харчы выраслі на 1,4 %, на нехарчовыя тавары – на 0,7 %, а на паслугі – на 0,5 %. З пачатку года харчы падаражэлі на 4,2 %, нехарчовыя тавары – на 2,2 %, а паслугі – на 5,1 %.
За год харчы падаражэлі на 8,3 %, нехарчовыя тавары – на 3,6 %, а паслугі – на 7 %.
З 15 красавіка ўрад Беларусі скасаваў рэгуляванне цэнаў на больш як сотню відаў тавараў. Пакінуў да 1 траўня рэгуляванне цэнаў на сем тавараў – і 17 красавіка падняў гэтыя цэны.
Якуб Хруст belsat.eu
