У Ямала-Ненецкай аўтаномнай акрузе адбыўся пажар на нафтагазавым радовішчы, дзе працуе кампанія «Беларуснафта-Сібір». У выніку пацярпелі тры работнікі, а буравая вышка абвалілася.
Расейскія выданні паведамілі пра пажар ў Ямала-Ненецкай аўтаномнай акрузе на нафтагазавым радовішчы прадпрыемства «Харапурнефтегаз», гэта даччыная кампанія дзяржаўнай «Роснефти». Паводле каналаў Mash і Shot, на гэтай пляцоўцы працуе беларуская кампанія «Беларуснафта-Сібір».
Паведамляецца, што ў выніку здарэння пацярпелі тры работнікі, яны ў рэанімацыі ў цяжкім стане.
Грамадзянства нафтавікоў не ўдакладняюць. У 2023 годзе, паводле кіраўніка прадпрыемства Дзмітрыя Гузава, там працавалі 1435 беларусаў, а агульны лік работнікаў – 1845.
Пажар на радовішчы пачаўся яшчэ 10 траўня, і дасюль даць рады з агнём не ўдалося. Буравая вышка абрынулася, там усцяж гараць дзве свідравіны, агонь дасягае 25 метраў.
Прычыны здарэння высвятляюцца. Паводле неафіцыйных звестак, узгаранне пачалося праз «рэзкае паступленне газу ў ствол свідравіны».
Рэгіянальнае ўпраўленне Следчага камітэту Расеі пачало даследчае правяранне, піша выданне ura.ru.
«Флагшток» удакладняе, што знішчаная буравая вышка каштуе $ 10–30 млн.
Сцяпан Кубік belsat.eu
