Апоўначы ў нядзелю скончылася часовае замірэнне, пра якое Масква абвесціла напярэдадні Дня Перамогі. Уначы Расея атакавала Украіну больш як 100 дронамі, адзін заляцеў у Беларусь.
Пра залёт расейскага беспілотніка ў паветраную прастору Беларусі паведаміў украінскі маніторынгавы канал «Ринда моніторить», на гэта звярнула ўвагу выданне «Флагшток».
Дрон трапіў у беларускае неба праз мяжу з Украінаю ў Брагінскім раёне а 6:00. Што сталася з гэтым апаратам, невядома.
Агулам, як падлічылі ў ЗСУ, мінулаю ноччу Расея запусціла 108 ударных беспілотнікаў і беспілотнікаў-імітатараў, якія пагрозы не нясуць, аднак адцягваюць увагу паветранай абароны.
Украінскія вайскоўцы збілі 60 ударных дронаў, 41 беспілотнік-імітатар быў «лакацыйна страчаны».
«У выніку варожай атакі пацярпела Сумская вобласць», – паведаміў Генштаб ЗСУ.
Апоўначы ў нядзелю скончылася часовае замірэнне, пра якое Масква абвесціла ў аднабаковым парадку. Яно трывала з поўначы 8 траўня.
У Міністэрстве абароны Расеі заявілі, што «строга выконвалі рэжым спынення агню і заставаліся на раней занятых пазіцыях», а вось украінцы нібыта больш за 14 тысячаў разоў парушылі замірэнне, 5 разоў спрабавалі прарвацца праз мяжу ў Курскую і Белгародскую вобласці, зладзілі 37 атак і адну выведку боем.
Пры гэтым, паводле ЗСУ, аніякага «строгага выканання рэжыму спынення агню» з боку Расеі не было. Напрыклад, толькі 10 траўня зафіксавалі 161 баявое сутыкненне, пазіцыі ўкраінскіх вайскоўцаў і паселішчы зазналі 63 авіяцыйныя ўдары 96 кіраванымі бомбамі. «Акрамя таго, праціўнік учыніў больш за чатыры тысячы абстрэлаў, 85 з якіх – з рэактыўных сістэмаў залпавага агню», – паведамляецца ў справаздачы Генштабу ЗСУ.
Брытанскі Інстытут вывучэння вайны таксама сведчыць, што расейскія войскі працягнулі баявыя дзеянні, нягледзячы на абвешчанае часовае замірэнне.
Сцяпан Кубік belsat.eu
