8 траўня беларускага актывіста Змітра Грынкевіча пасля візарану – кароткачасовага выезду з краіны для абнулення легальнага тэрміну знаходжання – не ўпусцілі назад у Грузію. Пра тое, якія катэгорыі беларусаў таксама могуць з гэтым сутыкнуцца і што ім варта рабіць, каб гэтага не было, «Белсату» расказаў юрыст, праваабаронца Раман Кісляк.
Суразмоўца адзначыў, што першы выпадак, калі беларуса пасля візарану не ўпусцілі назад у Грузію, адбыўся ў 2022 годзе. У 2023 годзе быў ужо рэзанансны выпадак – у краіну не змог вярнуцца Яўген Гацак, адзін з заснавальнікаў беларускай дыяспары Аджарыі. Але таксама, паводле юрыста, усё больш і больш здараецца непублічных выпадкаў, калі беларусаў не ўпускаюць пасля візарану ў Грузію.
Раман Кісляк падкрэсліў, што візаран – «гэта заўсёды латарэя», бо ўлады могуць не ўпусціць пасля выезду назад. А абскарджанне потым займае гады. Напрыклад, справа Гацака ўсё яшчэ знаходзіцца ў Вярхоўным судзе Грузіі, хоць сам ён ужо даўно жыве ў Польшчы.
,,«Хутчэй за ўсё, што грузінскі ўрад, спецслужбы не хочуць бачыць тут моцную дыяспару. Усіх, хто больш-менш актыўны, хто навідавоку, хто не хавае сваю пазіцыю і актыўна ўдзельнічае ў справах дыяспары, уключаючы вядзенне блогаў, правядзенне акцыяў. Па ўсёй бачнасці, усе гэтыя людзі пад рызыкай не прайсці візаран, калі ў іх няма іншых прававых падстаў для знаходжання на тэрыторыі Грузіі», – заявіў праваабаронца.
Каб не падвяргацца рызыцы ён параіў беларусам легалізавацца: або атрымаць від на жыхарства, або падацца на прытулак. Тым больш, што ўлады Грузіі якраз хочуць змяніць міграцыйнае заканадаўства.
«Быў досыць лёгкі парадак уезду і знаходжання, і ён трошкі падкупляе. Магчымасць год знаходзіцца, потым проста выехаць, з'ехаць, зрабіць візаран, гэта падкупляе. Але ў гэтай лёгкасці ёсць небяспека прыхаваная, што могуць не пусціць», – сказаў Кісляк.
Для звычайных турыстаў з Беларусі ён не прадбачыць праблемаў для паездак у Грузію, толькі для тых, хто стала жыве ў краіне на падставе бязвізавага ўезду – «у любы момант Грузія можа не пусціць на візаран».
Тым жа, хто бачыць, што яго могуць не ўпусціць у Грузію, юрыст раіць адразу на мяжы падавацца на прытулак, гэта мяняе прававы статус асобы. Калі ўсё ж не ўпусцілі, то або спрабаваць уехаць зноў, або ўладкоўвацца ў той краіне, дзе апынуўся, напрыклад, у Арменіі, або пераязджаць у нейкую трэцюю краіну, у Еўразвяз.
Актывіста Змітра Грынкевіча, які жыў у Батумі і займаўся продажам беларускай і ўкраінскай сімволікі, 8 траўня не пусцілі ў Грузію пасля візарану. Яго трымалі на грузінска-армянскай мяжы недзе паўтары гадзіны, «а пасля вынеслі паперу, сказалі, вывелі і ўсё». Праваабаронца Кісляк назваў забарону на ўезду Грынкевічу ўдарам па беларускай дыяспары Аджарыі.
Аліна Скрабунова, Якуб Хруст belsat.eu
