Халоднае надвор’е ў Беларусі будзе захоўвацца яшчэ недзе два тыдні, сведчаць прагнозы сіноптыкаў. А пакуль у краіне працягваюць абнаўляцца тэмпературныя антырэкорды траўня.
У Беларусі 9 траўня быў пабіты абсалютны рэкорд мінімальнай тэмпературы, усталяваны ў 2024 года -4.6° у Верхнядзвінску. Яго перабілі сёння Лынтупы тэмпературай -5.2°, паведамляе тэлеграм-канал @nadvorie. Агулам ноччу з 8 на 9 траўня ў Беларусі былі абноўленыя 23 мінімумы тэмпературы. А раніцай 10 траўня ў Кобрыне ішоў дождж са снегам.
Які прагноз надвор’я?
Як адзначае Белгідрамет, 11 траўня надвор'е ў Беларусі працягне вызначаць халодная няўстойлівая паветраная маса. Чакаецца пераменная воблачнасць. Уначы пераважна без ападкаў. Днём месцамі па рэспубліцы пройдуць невялікія кароткачасовыя ападкі (у асноўным дождж), магчымыя навальніцы. Ноччу і раніцай месцамі па краіне будзе згушчацца слабы туман. Вецер паўночны ад слабога да ўмеранага. Ноччу на большай частцы тэрыторыі краіны чакаюцца замаразкі 0..-5°С, месцамі мінімальная тэмпература паветра складзе +1..+5°C; максімальная тэмпература паветра днём +9..+14°С.
12 траўня ноччу па паўночным усходзе, раніцай і днём на большай частцы тэрыторыі краіны пройдуць кароткачасовыя ападкі (у асноўным дождж). Ноччу і раніцай у асобных раёнах будзе згушчацца слабы туман. Вецер паўночна-заходні, паўночны ад слабога да ўмеранага, днём месцамі парывісты. Ноччу на большай частцы тэрыторыі чакаюцца замаразкі 0..-4°С, месцамі мінімальная тэмпература паветра складзе +1..+5°C; максімальная тэмпература паветра днём +7..+14°С.
13 траўня ноччу месцамі, днём у шмат якіх раёнах пройдуць невялікія кароткачасовыя ападкі (у асноўным дождж). Уначы і раніцай у асобных раёнах краіны будзе згушчацца слабы туман. Вецер паўночна-заходні ўмераны, удзень месцамі парывісты. Тэмпература паветра мінімальная ноччу +1..+5°С, месцамі чакаюцца замаразкі 0..-4°C; максімальная тэмпература паветра ўдзень +9..+16°.
,,«А пакуль цярпіце», – адзначае аўтар каналу.
Нагадаем, што з 12 траўня ў гарадах Беларусі запланавана пачаць планавае адключэнне гарачай вады. У Менску – з 14 траўня.
Якуб Хруст belsat.eu
