Адная з менскіх кампаніяў, якая дапамагае афармляць шэнгенскія візы, апублікавала ў сацыяльнай сетцы Threads польскую працоўную візу, выдадзеную грамадзяніну Беларусі. Дазвол аказаўся нетыповым і рэдкім, адзначае «Zerkalo».
На здымку была апублікаваная двухразовая польская нацыянальная віза тэрмінам на 365 дзён. Візавая экспертка Анастасія Лысакоўская адзначае, што за сем гадоў практыкі з падобным сустракаецца ўпершыню. Раней, паводле яе, нацыянальныя нетурыстычныя візы заўсёды былі шматразовымі, то бок без абмежавання колькасці ўездаў.
«Тут жа мы бачым, што ўладальнік мае права за год уехаць у Шэнгенскую зону толькі двойчы, далей віза будзе пагашаная», – кажа экспертка.
На яе думку, калі такія візы пачнуць выдаваць часцей, то першыя, у каго могуць узнікнуць складанасці, – гэта кіроўцы, якім трэба пастаянна перасякаць межы. Таксама ўладальнікі такіх візаў не змогуць ездзіць у Беларусі або выязджаць за межы Шэнгену.
,,«Прыехаўшы ў Польшчу, уладальніку такой візы трэба працаўладкавацца, запусціць працэс легалізацыі і чакаць карту побыту. Толькі атрымаўшы яе, чалавек зможа быць больш свабодным у сваіх рухах», – адзначае Лысакоўская.
Выдачу такіх візаў яна звязвае з узмацненнем жорсткасці выдачы эміграцыйных візаў Польшчы. У прыватнасці, яны дазваляюць скараціць магчымасць нямэтавага выкарыстання такіх візаў – па набыткі або ў турыстычных мэтах. Акрамя таго, такі дакумент матывуе ўладальніка легалізавацца адразу па прыездзе ў Польшчу.
Нагадаем, што днямі ў Польшчы падпісалі некалькі важных законаў, якія рэгулююць працу замежнікаў. «Белсат» і юрыстка ў іміграцыйным праве Дар'я Грышановіч апавядаюць, якія новаўвядзенні могуць закрануць беларусаў у Польшчы.
Якуб Хруст belsat.eu
