Віцэ-прэзідэнт Джэй Ды Вэнс у размове з кансерватыўным радыёвядоўцам Г'ю Г’юітам выказаўся адносна таго, якіх палітычных поглядаў прытрымліваецца новаабраны Папа Леў XIV. Раней пантыфік, яшчэ будучы кардыналам, крытыкаваў палітыка за ягоныя дзеянні.
Джэй Ды Вэнс заявіў: гэта «выдатна», што Папам абралі грамадзяніна ЗША і шмат людзей казалі, што такога ніколі не будзе, піша «Fox News».
«Мы не так шмат ведаем пра яго, але я проста зычу яму ўсяго найлепшага. Я каталік. Цяпер ён кіраўнік Касцёлу, і мы будзем маліцца за ягоную мудрасць, за ягоныя правільныя рашэнні і ягонае добрае здароўе, спадзявацца, што ў яго будзе доўгі і паспяховы пантыфікат», – сказаў ён.
Адносна таго, Леў XIV – ліберал ці кансерватар, і ці будзе крытыкаваць амерыканскія ўлады, віцэ-прэзідэнт ЗША падкрэсліў: «Цяжка ўпісаць 2000-гадовы інстытут у палітыку Амерыкі 2025 года». Ён заклікаў не гуляцца ў палітызацыю пантыфіка.
,,«Я ўпэўнены, што ён скажа шмат рэчаў, якія мне падабаюцца. Я ўпэўнены, што ён скажа некаторыя рэчы, з якімі я не згодны, але я працягну маліцца за яго і Касцёл, нягледзячы на ўсё гэта і насуперак усяму, і менавіта так я буду з гэтым спраўляцца», – адзначыў палітык.
Вэнс падкрэсліў: ёсць шмат поглядаў, якіх прытрымліваецца каталіцкае кіраўніцтва, якія можна аднесці да правага боку спектру, ёсць шмат поглядаў, больш уласцівых для левага, а «ёсць шмат поглядаў, якія наагул нялёгка супаставіць з палітыкаю». Ён заклікаў дазволіць Касцёлу «ратаваць душы» і не спрабаваць «уціснуць яго ў вызначаныя палітычныя рамкі».
8 траўня ў Ватыкане 267-м Папам Рымскім абралі нарадзінца Чыкага Робэрта Фрэнсіса Прэваста, які доўгі час служыў у Перу. Ён узяў сабе імя Леў XIV. У 2023 годзе Папа Францішак прызначыў Прэваста кіраўніком дыкастэрыі ў справах біскупаў. Раней у сваіх сацыяльных сетках іерарх неаднаразова крытыкаваў адміністрацыю Доналда Трампа і асабліва віцэ-прэзідэнта Вэнса перадусім за міграцыйную палітыку. Гэта не спадабалася шэрагу амерыканскіх трампістаў.
Якуб Хруст belsat.eu
