Беларускія турысты расказалі пра аварыю ў Егіпце: турыстычны аўтобус спрабаваў раз’ехацца з легкавіком, перакуліўся на бок. Два чалавекі ў легкавіку загінулі, дзве жанчыны ў аўтобусе атрымалі чэрапна-мазгавыя траўмы.
Па дарозе з Шарм-эш-Шэйху ў Каір аўтобус з турыстамі з Беларусі, Расеі і Казахстану трапіў у аварыю, расказалі беларускія турысты выданню, якое просіць на яго не спасылацца. «Белсат» не знайшоў навінаў пра апісаную аварыю ў егіпецкіх выданнях.
Паводле турыстаў, познім вечарам аўтобус спрабаваў раз’ехацца з легкавіком, які выехаў на сустрэчную паласу, павярнуў на ўзбочыну і паваліўся на левы бок. У легкавіку ў выніку аварыі загінулі мужчына і дзіця, жанчына і яшчэ адно дзіця былі дастаўленыя ў лякарню. З пасажыраў аўтобусу дзве жанчыны былі шпіталізаваныя з чэрапна-мазгавымі траўмамі, астатнія атрымалі толькі лёгкія пашкоджанні. Як расказвае турыстка, «хуткая дапамога» прыехала на месца здарэння толькі праз 15–20 хвілін.
Па словах турысткі, тураператар узяў на сябе выдаткі на лекаванне пры ўмове, што турысты падпішуць паперу аб адсутнасці прэтэнзіяў да яго. Выданне апублікавала фота той распіскі: на ёй гаворыцца пра аварыю з аўтобусам між Каірам і Шарм-эш-Шэйхам, але дата здарэння не пазначаная. Таксама выданне апублікавала фота траўмаў людзей. Фота з месца здарэння турыстка не прадставіла: растлумачыла гэта тым, што пасажырам «было не да таго».
Алесь Наваборскі belsat.eu
