У 2015 годзе праект Лявона Вольскага «Крамбамбуля» заяўляў, што «сыходзіць у лясы». Мінулы раз гурт «выходзіў з лясоў» у 2017 годзе. 9 траўня 2025 года «выйшаў з лесу» з песняй пра перамогу – але, падобна, не пра тую можна падумаць па дні выдання.
Беларускі гурт «Крамбамбуля» выдаў 9 траўня новую песню «Толькі перамога!» – першую новую песню з 2017 года. Трэк можна бясплатна паслухаць на папулярных музычных пляцоўках.
Хоць песня пра перамогу была выдадзеная 9 траўня, яна, падобна, прысвечаная не перамозе над нацысцкай Нямеччынай 80 гадоў таму. У тэксце няма адсылак да Другой сусветнай вайны, а гаворыцца толькі, што гэта беларуская ідэя: «Трэба нам перамагчы войскі цёмнае начы, і тады ўсё заквітнее».
Гурт растлумачыў:
«Без Перамогі, нашай новай, сапраўднай Перамогі, а не той, колішняй, пакрытай, бы павуціннем, спекуляцыямі і фальшам, не ўдасца бачыць яскравыя фарбы свету, чуць чароўную музыку жыцця і дыхаць на поўныя грудзі. Паглядзіце адно аднаму ў вочы! Колькі можна жыць пад прыгнётам і выконваць акупацыйныя законы?! Ці не вартыя мы паўнавартаснага, годнага, сапраўднага жыцця?»
***
«Крамбамбуля» была ўтвораная Лявонам Вольскім у 2001 годзе як іранічны праект на алкагольную тэматыку. Гурт запісаў пяць поўнафарматных альбомаў і выдаў шэраг кліпаў. Хітамі сталі вясёлыя «Госці» і «Турысты», лірычная «Абсэнт», але ў апошнім на сёння альбоме «Чырвоны штраль» гурт перайшоў да больш «ваяўнічай» і «партызанскай» тэматыкі. У 2015 годзе гурт абвясціў пра «сыход у лясы» – прыпыненне актыўнасці. Апошні раз «Крамбамбуля» выступала і выдавала новую песню ў 2017-м – тады выйшла «Партызаны каляднага лесу».
Сёлета «Крамбамбулю» можна будзе паслухаць ужывую 31 траўня на сольным канцэрце ў Вільні, 12 ліпеня на фестывалі «Tutaka» каля Гарадка на Падляшшы ў Польшчы і 5 верасня на фестывалі «Graj» у Варшаве.
Вольскі – колішні лідар гуртоў «Мроя» і «N.R.M.» – цяпер выступае сольна і з гуртом імя сябе: «Volski».
Алесь Наваборскі belsat.eu
