22-гадовы хлопец забіў сякерай 53-гадовую жанчыну і параніў супрацоўніка аховы Варшаўскага ўніверсітэту. Нападнік прызнаў сябе вінаватым і расказаў пра матывы – зараз ягоны стан будуць ацэньваць псіхіятры.
Увечары 7 траўня хлопец з сякерай уварваўся на тэрыторыю Варшаўскага ўніверсітэту ў цэнтры гораду і напаў на людзей, забіў працаўніцу ўніверсітэту, параніў ахоўніка. Паліцыя прыбыла на месца праз 4 хвіліны, нападнік быў затрыманы: ім аказаўся 22-гадовы грамадзянін Польшчы, жыхар Варшавы і студэнт 3 курсу юрыдычнага факультэту Мешка Р.
Паліцыя расказала, што нападніку выставілі абвінавачванне паводле трох пунктаў: забойства з асаблівай жорсткасцю, замах на забойства і апаганьванне цела ахвяры. Яму пагражае пажыццёвае зняволенне.
Матывы нападніка сталі вядомыя 9 траўня. Як перадае «Gazeta Wyborcza», Мешка Р. адказаў на пытанні пракурора і суду, прызнаў сябе вінаватым і апісаў паслядоўнасць падзеяў. Ён распавёў, што «ў свеце ёсць драпежнікі і ахвяры, ён хацеў стаць драпежнікам, і стане ім толькі калі кагосьці заб’е».
З ягоных тлумачэнняў пракурор робіць выснову, што забойстве не было спланаваным, а ахвяра была, імаверна, выпадковай. Падобна, што ідэя нападу прыйшла ў галаву затрыманаму толькі перад забойствам.
Эксперты-псіхіятры зараз маюць вызначыць, ці быў ён у свядомым стане падчас злачынства. Пакуль суд прыняў рашэнне пра часовы арышт, але пракурор хадайніцтваў аб змяшчэнні яго ў папраўчую ўстанову з псіхіятрычным аддзяленнем.
,,«Я не думаю, што ён праявіў нейкае раскаянне. Казаў, што часам адчувае, часам не», – расказаў пра нападніка пракурор.
«Gazeta Wyborcza» сцвярджае, што неафіцыйна даведалася пра паслядоўнасць падзеяў: Мешка Р. узяў сякеру ў сябе з дому ў Гдыні, куды ездзіў перад нападам, пайшоў на лекцыю ў аўдыторыі, выйшаў у прыбіральню, там вырашыў, што хоча кагосьці забіць, і атакаваў першую асобу, якая яму трапілася.
Алесь Наваборскі belsat.eu
