Старшыня працоўнай групы Каардынацыйнае рады ў справе знікнення Анжалікі Мельнікавай расказаў пра хаду справы.
У Польшчы расследуюць знікненне спікеркі Каардынацыйнае рады Беларусі Анжалікі Мельнікавай. Следства вядуць на падставе артыкулу пра незаконнае пазбаўленне волі.
Кіраўнік Народнага антыкрызіснага ўпраўлення, сябра Каардынацыйнай рады і Аб’яднанага пераходнага кабінету Павел Латушка паведаміў 24 красавіка, што атрымаў звесткі пра расследаванне ў Польшчы знікнення спікеркі КР Анжалікі Мельнікавай.
Зніклая спікерка Каардынацыйнай рады Анжаліка Мельнікава адправілася з Лондану на Шры-Ланку з дзецьмі, а з Шры-Ланкі вылецела далей. Пра гэта распавёў у эфіры «Белсату» Цімур Алеўскі, суаўтар расследавання пра Мельнікаву, якое выйшла ў польскім часопісе «Polityka». Ён таксама анансаваў працяг расследавання.
Аляксандр Паршанкоў, старшыня працоўнай групы Каардынацыйнай рады ў справе знікнення Анжалікі Мельнікавай, расказаў в эфіры «Студыі Белсат»:
– На сёння ў працоўнай групе няма інфармацыі, дзе Анжаліка Мельнікава. Мы карыстаемся толькі няспраўджанай інфармацыяй, што з’яўляецца ці ў каментарах, ці ў медыях. Але нейкай пацверджанай інфармацыі ў нас няма. Працоўная група займаецца не толькі зборам і маніторынгам, але і распрацоўваннем магчымых сцэнароў рэагавання на тое, што адбылося. У нас няма магчымасцяў і паўнамоцтваў праводзіць незалежнае расследаванне ў гэтай справе. З чальцамі Каардынацыйнае рады звязваліся польскія спецслужбы. Цяпер паскорылася афіцыйнае расследаванне. Чальцы Каардынацыйнае рады даюць каментары польскім праваахоўнікам.
