Лідарка дэмакратычных сілаў Беларусі Святлана Ціханоўская падчас свайго візіту ў ЗША сустрэлася з 43-м амерыканскім прэзідэнтам Джорджам Бушам. Пра гэта паведамляецца ў тэлеграм-канале Ціханоўскай.
Сустрэча доўжылася больш за паўтары гадзіны. Святлана Ціханоўская і Джордж Буш абмеркавалі, як вызваліць беларускіх палітвязняў і надаць справе міжнародны розгалас; як зрабіць Беларусь часткай справядлівага і доўгатэрміновага міру ва Усходняй Еўропе; як змагацца з дыктатурай і рэпрэсіямі, а таксама абараніць беларусаў, якія не спынілі супраціву.
,,«Дзякую вам за вашую адданасць беларускай справе і асабліва – за ўсе вашыя намаганні па вызваленні палітвязняў. Вас беларусы памятаюць, ведаюць і ніколі не забудуць вашую падтрымку. Я ганаруся магчымасцю сустрэцца з вамі і хачу, каб вы ведалі – вы для нас герой, як і прэзідэнт Рэйган для вашага пакалення», – сказала Святлана Ціханоўская падчас сустрэчы.
Буш адказаў, што тое, што адбываецца ў Беларусі, мае значэнне для ЗША.
«Калі дыктатары, падобныя да Лукашэнкі, прыгнятаюць свой народ за мяжой, гэта змяняе наш свет і нашае жыццё ў цэлым. Краіна становіцца менш бяспечнай. Такія смелыя лідары, як Святлана Ціханоўская, якія адстойваюць дэмакратыю, нягледзячы на наступствы, неабходныя для нашай будучыні, міру і працвітання», – дадаў Джордж Буш.
Ціханоўская на знак удзячнасці ўручыла Бушу Крыж Добрасуседства. Гэтая ўзнагарода ўручаецца прэзідэнтам, прэм’ер-міністрам, палітычным лідарам, якія зрабілі істотны ўклад у барацьбу беларусаў за свабоду.
Ціханоўская таксама падарыла Джорджу Бушу спецыяльны альбом з архіўнымі фатаграфіямі і дакументамі, прысвечанымі ягонаму падтрыманню Беларусі падчас прэзідэнцтва.
Джордж Буш падпісаў першы Акт аб дэмакратыі ў Беларусі, дабіўся вызвалення палітвязняў пасля падзеяў 2006 года і істотна паўплываў на фармаванне амерыканскай палітыкі ў дачыненні Беларусі.
Арсен Рудэнка belsat.eu
